Բավական է տարբերություն դնել աղջիկների և տղաների միջև. Արսեն Թորոսյան (տեսանյութ)

ՀՀ առողջապահության նախարար Արսեն Թորոսյանը մասնակցում է Երևանի Հաղթանակի զբոսայգում տեղի ունեցող «Բավական է» սոցիալական արշավին, որն ուղղված է ընդդեմ սելեկտիվ աբորտների:

Արսեն Թորոսյանը Մայր Հայաստան հուշարձանի մոտից իր դստեր հետ ուղիղ կապով դիմեց իր հետևորդներին՝ խոսելով արշավի կարևորության մասին: «Այս նախաձեռնությամբ մենք կոչ ենք անում երբեք տարբերություն չդնել սեռերի միջև: Տարեկան մոտ 1300 աղջիկ չի ծնվում Հայաստանում, իսկ վերջին տարիներին 40 հազար աղջիկ ավելի չի ծնվել հղիության սելեկտիվ ընդհատումների պատճառով»,-նշեց նախարարը:

Նա անդրադարձավ նաև ակցիայի անվանը: «Բավականը» կնոջ հայկական անուն է։ Համաձայն տարածված ավանդույթի՝ ծնողները, որոնք տղա են ցանկանում, բայց անընդմեջ երկու կամ երեք դուստր են ունենում, կրտսեր աղջկա անունը Բավական են դնում, որպեսզի այլևս աղջիկ չունենան։

«Բավական է տարբերություն դնել սեռերի միջև: Ճիշտ է՝ մենք աբորտների ցուցանիշներով աշխարհում վատ տեղում ենք, սակայն մեզ մոտ դրական առաջընթաց կա: Նախկինում 115 տղային համեմատ ծնվում էր 100 աղջիկ էր, ցուցանիշն այժմ բարելավել է: Հուսով ենք, որ առաջիկայում կհասնենք նորմայի»,- նշեց նախարարը:

Նշենք, որ արշավի նախաձեռնողն է Doping ստեղծարար ընկերությունը՝ ՄԱԿ-ի Բնակչության հիմնադրամի հայաստանյան գրասենյակի և ՀՀ առողջապահության նախարարության հետ համագործակցությամբ: Արշավի անունն ու պաշտոնական հեշթեգն է՝ #ԲավականԷ (#Bavakane)։ Արշավի առաջխաղացումն իրականացվելու է հայտնի անձանց, սոցցանցերի ու տարբեր ԶԼՄ-ի ներգրավմամբ։

Հիշեցնենք, որ այսօր՝ հոկտեմբերի 11-ին, Աղջիկ երեխաների միջազգային օրն է:

Օրվա նպատակն է ուշադրություն դարձնել այն խնդիրների լուծման վրա, որոնց բախվում են աշխարհի բոլոր աղջիկները, եւ նպաստել նրանց իրավունքների ընդլայնմանն ու պաշտպանությանը:

Վիճակագրական տվյալների համաձայն Հայաստանում տարեկան 1400 աղջիկ չի ծնվում՝ սեռով պայմանավորված հղիության արհեստական ընդհատումների պատճառով: Եթե հղիության սեռով պայմանավորված արհեստական ընդհատումների երեւույթը շարունակվի ներկա տեմպով, ապա, ըստ կանխատեսումների, մինչեւ 2060-ը Հայաստանը կարող է կորցնել գրեթե 93.000 կին կամ ապագա մայր: Տարեկան չծնված նորածին աղջիկների թիվը մինչեւ 2060-ը կարող է հասնել մոտ 2000-ի: Հայաստանում նորածինների սեռերի անհամամասնությունը, բացասական ազդեցություն կունենա ընտանիք կազմելու հնարավորության վրա եւ կարող է արտագաղթի հավելյալ խթան դառնալ: Արդյունքում, աղջիկներին տղաներով փոխարինելու պատճառով, ՀՀ բնակչությունը մինչեւ 2060-ը կարող է կրճատվել հավելյալ մոտ 80.000 քաղաքացիով: