«Ժողովուրդ». Ինչ է կատարվում ՍԴ պատերի ներսում

«Ժողովուրդ» թերթը գրում է․

«Իշխող թիմից հոկտեմբերի 10-12-ը 4 իրավաբան է մեկնել Իտալիա, մասնակցելու ԵԽԽՎ Վենետիկի հանձնաժողովի 120-րդ լիագումար նիստին: «Ժողովուրդ» օրաթերթի տեղեկություններով` վենետիկյան քննարկումներին մասնակցել են արդարադատության նախարար Ռուստամ Բադասյանը տեղակալ Քրիստինե Գրիգորյանի հետ, ՀՀ կառավարության ներկայացուցիչը ՄԻԵԴ-ում՝ Եղիշե Կիրակոսյանը, ԱԺ պետաիրավական հարցերի հանձնաժողովի նախագահ Վլադիմիր Վարդանյանը։ Հանձնաժողովում Հայաստանին վերաբերող 2 հարց է քննարկվել` առաջինը` դատաիրավական բարեփոխումների փաթեթին հավանություն տալու հարցը եւ երկրորդը` Ստամբուլյան կոնվենցիայի սահմանադրականության վերաբերյալ Ռուստամ Բադասյանի դիմումը հանձնաժողովին։

«Ժողովուրդ» օրաթերթի տեղեկություններով` իշխանականները Վենետիկ են մեկնել` հանձնաժողովի հետ բանակցելու Ստամբուլյան կոնվենցիայի վավերացմամբ ՍԴ շուրջ ստեղծված թնջուկը հօգուտ իշխանության լուծելու օրակարգով: Այսինքն՝ Վենետիկի հանձնաժողովը դատաիրավական բարեփոխումների փաթեթի մեջ հավանություն է տալիս Հրայր Թովմասյանի հեռացմանը` Ստամբուլի կոնվենցիան Հայաստանում վավերացնելու պայմանով: Ինչ հաջողություններ են ունեցել իշխանականները` դեռ կպարզվի: Մինչ այդ արդարադատության նախարարի մամուլի քարտուղար Լուսինե Մարտիրոսյանը «Ժողովուրդ» օրաթերթին փոխանցեց` ոչ մի արտառոց բան չկա. վարչապետ Փաշինյանի սեպտեմբերի 26-ի որոշումով է պատվիրակությունը հոկտեմբերի 10-12-ը գործուղվել Վենետիկի հանձնաժողով: Վենետիկցիների հետ գործարքի մասին լուրերն, ըստ Լ. Մարտիրոսյանի, իրականությանը չեն համապատասխանում. «Մտացածին են»:

«Ժողովուրդ» օրաթերթին, ի դեպ, բացառիկ տեղեկությոններ են հասել նաեւ, թե ինչ է կատարվում այս օրերին Բարձրագույն դատարանի պատերից ներս: Կընդունե՞ն վարույթ ԱԺ դիմումը` ՍԴ նախագահի լիազորությունները դադարեցնելու վերաբերյալ:

Մեր տեղեկություններով` ՍԴ-ում ամենեւին էլ տրամադրված չեն ընդունել ու ընթացք տալ այդ դիումին, նշում են, թե այն, ինչ ԱԺ-ն ուղարկել է ՍԴ, չի կարող քննության առարկա դառնալ, քանի որ կան որոշակի «պրոցեդուրային» խախտումներ: Բացի այդ, մեր աղբյուրները փոխանցում են, որ ՍԴ դատավորների մի մասը համարում է, որ ԱԺ-ի ուղարկած այդ փաստաթուղթը կանոնակարգ-օրենքի խախտմամբ են ուղարկել բարձրագույն դատարան»։

Առավել մանրամասն՝ թերթի այսօրվա համարում