Մինչև ԱԱԾ-ի ցրվելը մենք Նիկոլից կպրծնենք. Գուրգեն Եղիազարյան

Դեռ նախորդ շաբաթ «Սասնա ծռեր» համահայկական կուսակցության քարտուղարության  համակարգող Վարուժան Ավետիսյանը մամուլի ասուլիսին անդրադարձավ ԱԱԾ-ն կազմալուծելուն և փոխարենը անվտանգության Ազգային համակարգ  ստեղծելուն:  Հարցի դրական ու բացասական կողմերի մասին  ԼՈՒՐԵՐ.com-ի թղթակիցը զրուցեց քաղաքագետ Գուրգեն Եղիազարյանի հետ, ով նախկինում եղել է նաև պաշտպանության, ազգային անվտանգության և ներքին գործերի մշտական հանձնաժողովների անդամ։ 

«Երկիրը քանդում են: Ինչպես կարող է այս վիճակում, երբ արևելքում Ադրբեջանն է, իսկ արևմուտքում՝ Թուրքիան, կազմալուծել ԱԱԾ-ն: Հիմա մենք նաև տեսնում ենք, թե Թուրքիան ինչեր է անում Սիրիայում  ու այդ ամենին ինչպես է վերաբերվում Եվրոպան»,- նշեց քաղաքական գործիչը:

Ըստ նրա՝ եթե նույնիսկ սիմվոլիկ պատկերացնենք, որ ադրբեջանական կամ թուրքական գումարներով լրտես է սողոսկում Հայաստան, առաջին բանը, որ պետք է անի՝ պետք է ԱԱԾ-ն վերացնի. «Չկա անվտանգություն, չկա հետախուզություն, չկա երկիր»,- սրտնեղում է Եղիազարյանը: 

Եղիազարյանը վստահ է, որ այս դեպքում արդեն երկիրը կազմաքանդվելու է, քանի որ գործող իշխանությունն ու նրանց համախոհները ամեն ջանք գործադրում են, որպեսզի վերացնեն երկրում գործող ինստիտուտները:

«Ռուսաստանի հետ համագործակցությունը մեզ համար շատ կարևոր է: Մեր սահմանները  հսկում և պաշտպանում են ռուսները, հայերի հետ միասին: 102-րդ  ռազմական բազան այն միակ միավորն է, որ այսօր թուրքերը չեն համարձակվում ներս խուժել»,- նշեց նա:  

Մեր այն հարցին, թե, այնուամենայնիվ, որքանով է իրատեսական ԱԱԾ-ի կազմալուծումը և որքան ժամանակում հնարավոր կլինի իրականացնել, մեր զրուցակիցը պատասխանեց. «Մինչև ԱԱԾ-ի ցրվելը մենք Նիկոլից կպրծնենք: Ինչպես նաև կազատվենք սորոսական մեծ ու փոքր լրտեսներից»: