Զարմանում եմ՝ ինձ չեն կարողացել գտնել այն ժամանակ, երբ եղել եմ քաղաքի կենտրոնում․ Դիլիջանի քաղաքապետ

Ոստիկանության կողմից տարածված տեսանյութում նշվում է, որ  դեռևս 2006թ-ին Դիլիջանի քաղաքապետ Արմեն Սանթրոսյանն, օգտագործելով պաշտոնեական դիրքը, Դիլիջանի նախկին «քաղսովետի» բազմահարկ շենքն աճուրդի է հանել։ Գործարքում տեղի են ունեցել խախտումներ, որի հետևանքով այս տարիների ընթացքում, քննությանն այս պահին հայտնի տվյալներով` հավաքագրված ընդհանուր մոտ 88 միլիոն 800 հազար դրամից քաղաքապետարանի բյուջե է փոխանցվել մոտ 15 միլիոն 600 հազար դրամ, ինչի հետևանքով քաղաքապետարանին շուրջ 73 միլիոն 200 հազար դրամի նյութական վնաս է պատճառվել: Դեպքի առթիվ հարուցվել է քրեական գործ: 

Մեկնաբանություն ստանալու համար ԼՈՒՐԵՐ․com-ը զրուցեց Դիլիջանի քաղաքապետ Արմեն Սանթրոսյանի հետ։ Վերջինիս խոսքով՝ հաղորդագրության տարածումից հետո է իմացել, որ իր դեմ գործ է հարուցվել։ Նրա խոսքով՝ ոստիկանության տեսանյութում նշվում է, թե չեն կարողանում հայտնաբերել իրեն, քանի որ բացակայում է երկրից, սակայն Սանթրոսյանը վստահեցնում է՝ իրեն կարելի էր տեսնել Դիլիջանի կենտրոնում․ «Զարմանում եմ, որ մեր ոստիկանությունը ինձ չի կարողացել գտնել այն ժամանակ, երբ եղել եմ Դիլիջանի կենտրոնում։ Ես իմ աշխատասենյակում եմ լինում, դեսպան, պատգամավորներ եմ ընդունել, որի մասին Դիլիջանի պաշտոնական կայքէջում էլ կան լուսանկարները։ Վաղն էլ Դիլիջան քաղաքի տոնն է, ես նորից լինելու եմ հրապարակում, եկեղեցում եմ լինելու և չեմ բացակայելու։ Ամբողջ օրը ես քաղաքում եմ լինում, չգիտեմ, թե ինչու տարածվեց այդ տեսանյութը»,- ասաց նա։ 

Ոստիկանության կողմից տարածված հաղորդագրությունից ու տեսանյութից հետո ներկայացե՞լ է ոստիկանություն հարցին ի պատասխան՝ Սանթրոսյանն ասաց․ «Ոչ չեմ գնացել, որևէ քայլ չեմ ձեռնարկել։ Ես սպասում եմ իրենց քայլին, որպեսզի հրավիրեն մեկնաբանվի, պարզաբանվի՝ ինչումն է խնդիրը, որտեղից է առաջացել և ինչ գործ են հարուցել»,- նշեց քաղաքապետը՝ հույս հայտնելով, որ պատշաճ ձևով քննություն կտարվի։ 

Անդրադառնալով դեռևս 2006թ.-ին տեղի ունեցած քաղսովետի շենքի աճուրդին և տեսանյութում նշվող գործարքին՝ Սանթրոսյանն ասաց․ «Աճուրդը կայացել է, բոլորի ստորագրությունները կան, բոլորը ներկա են, որևիցե խախտում չի եղել։ Չգիտեմ՝ որտեղ է գործը, ոստիկանությունում, թե՞ քննչականում, բայց անկախ ամեն ինչից, քննող մարմնից ակնկալում եմ օբյեկտիվ քննություն»,- ասաց նա։ 

Սոնա Հարությունյան