Երևանի տոնին հրշեջ-փրկարարները կիրականացնեն ուժեղացված հերթապահություն. խորհրդակցություն ԱԻՆ ՓԾ-ում

ՀՀ արտակարգ իրավիճակների նախարարությունում հոկտեմբերի 18-ին անցկացվել է փրկարար ծառայության հերթական ամենշաբաթյա խորհրդակցությունը, որը վարել է ծառայության տնօրեն, փ/ծ գնդապետ Արտակ Նահապետյանը: Այս մասին տեղեկացրին ՀՀ արտակարգ իրավիճակների նախարարության տեղեկատվության և հասարակայնության հետ կապերի վարչությունից։

«ՀՀ ԱԻ ՓԾ ստորաբաժանումների ղեկավարները, Երևան քաղաքի ու մարզային փրկարարական վարչության պետերը փրկարար ծառայության տնօրենին զեկուցեցին հաշվետու ժամանակահատվածում իրականացված աշխատանքների, գրանցված ահազանգերի, դեպքերի և պատահարների, փրկարար ծառայության տրանսպորտային միջոցների տեխնիկական վիճակի, ինչպես նաև արտակարգ իրավիճակների արձագանքման և փրկարարական աշխատանքների իրականացման վերաբերյալ ամփոփ տեղեկատվությունը:

ՀՀ ԱԻՆ ՃԿԱԿ պետ, փ/ծ գնդապետ Հովհաննես Խանգելդյանը զեկուցեց, որ նախորդ շաբաթվա ընթացքում «911» ծառայությունում գրանցվել է 16476 զանգ, 713 դեպք-պատահար: Հաշվետու ժամանակահատվածում գրանցվել է հրդեհի 142, ճանապարհատրանսպորտային պատահարների 56 դեպք: Դեպք-պատահարների հետևանքով զոհվել է 4 մարդ:

Փրկարար ծառայության տնօրեն Արտակ Նահապետյանը՝ «Էրեբունի-Երևան 2801» տոնակատարության շրջանակում նախատեսվող միջոցառումների անցկացման պատշաճ մակարդակն ապահովելու նպատակով, Երևան քաղաքում տեղակայված հրշեջ-փրկարարական ստորաբաժանումներին հանձնարարեց իրականացնել ուժեղացված հերթապահություն:

Խորհրդակցության ընթացքում ամփոփվեց Շիրակի մարզում ՝ ՀՀ պետական մարմինների, միջազգային կազմակերպությունների ներգրավմամբ, Միավորված ազգերի կազմակերպության Փախստականների հարցերով գերագույն հանձնակատարի գրասենյակի հետ համատեղ անցկացված «Աղետի կամ ռազմական գործողության հետևանքով միգրացիոն հոսքերի կառավարում» թեմայով հրամանատարաշտաբային ուսումնավարժությունը:

Արտակ Նահապետյանը շնորհակալություն հայտնեց ուսումնավարժանքը բարձր մակարդակով անցկացնելու համար և հանձնարարեց պարգևատրել աչքի ընկած փրկարար ծառայողներին:

Փրկարար ծառայության տնօրենին զեկուցվեց նաև հրշեջ-փրկարարական ջոկատներում իրականացվող շինարարական աշխատանքների ընթացքի վերաբերյալ:

Ամփոփելով խորհրդակցությունը՝ Արտակ Նահապետյանը տվեց ծառայության կազմակերպման հետ կապված մի շարք հանձնարարականներ»,- ասվում է հաղորդագրության մեջ: