ՍԴ-ն խորացրել է դատարանների նկատմամբ ճգնաժամը. Լիլիթ Մակունց (տեսանյութ)

Լիլիթ Մակունցը լրագրողների հետ զրույցում խոսել է Հրայր Թովմասյանին ՍԴ անդամի լիազորություններից զրկելու համար՝ «Իմ քայլ»-ի հետագա քայլերի մասին։ «Սահմանադրական դատարանն, ըստ էության, չի տվել պատասխան՝ Ազգային ժողովի կողմից ներկայացված այն հարցադրումներին կամ մտահոգություններին, որոնք պետք է հաստատվեին կամ փարատվեին։ Առկախված են մնացել այն բոլոր հարցադրումները, որոնք արծարծված են եղել նախագծում։ Փոխարենը Սահմանադրական դատարանը որոշում է կայացրել, որ պարզապես թողնում է առկախված և դրանով ԱԺ-ի նկատմամբ դրսևորվել է անհարգալից վերաբերմունք, որն, իհարկե, անարձագանք չի մնա։

ՍԴ-ն մի դիրք է ընդունել, որ, հերիք չէ, չի ուզում լուծումներ տալ ստեղծված իրավիճակին, այլ չի էլ ուզում քննարկել: Դրանով իսկ ՍԴ-ն խորացրել է այն վստահության ճգնաժամը, որը կա դատարանի նկատմամբ։ Մեր գործողությունները շարունակելու են մնալ նույնը, ինչ նախկինում էր։ Մենք մեր առջև խնդիր չէինք դրել լուծել ՍԴ-ի շուրջ ստեղծված ճգնաժամը, այդ մասին մենք հայտարարել էինք»,-ասաց Մակունցը։ 

Մակունցն անդրադարձել է նաև վարչապետ Նիկոլ Փաշինյանի գաղտնի հանձնարարականով նախարարների, փոխնախարարների և նախարարությունների գլխավոր քարտուղարների աշխատավարձերը բարձրացնելու լուրին, որը կառավարության կողմից չի հերքվել։ Մակունցն ասաց, որ տեղեկություն չունի, թե կառավարությունն ինչու է այդ ընթացակարգն ընտրել: