Թունյանի կարծիքով՝ նախարարներին 1․5 մլն աշխատավարձ տալու որոշումն արդարացված է (տեսանյութ)
ՔաղաքականԱԺ «Իմ քայլը» խմբակցության պատգամավոր Բաբկեն Թունյանը, ով նաև Տնտեսական հարցերով հանձնաժողովի նախագահն է, այսօր լրագրողների հետ զրույցում անդրադարձավ «Հետք»-ի հրապարակմանը, ըստ որի՝ Նիկոլ Փաշինյանը գաղտնի հրամանով բարձրացել է նախարարների ու փոխնախարարների աշխատավարձը: Թունյանն ասաց, որ ինքը նախօրոք տեղյակ չի եղել: Երեկ է իմացել:
Այն հարցին, թե ինչ ռիսկ կարող էր պարունակել, որ գաղտնի էր պահվել հանձնարարականը, պատգամավորը պատասխանեց. «Ես ռիսկեր չեմ տեսնում, բայց այդ հարցը ճիշտ կլինի ուղղեք կառավարությանը, հարցի հասցեատերն իրենք են»:
Թունյանի կարծիքով՝ նախարարներին մեկ ու կես միլիոն աշխատավարձ տալու որոշումն արդարացված է. «Արդարացված է, որովհետև մենք այսօր ունենք խնդիր կոմպետենտ, բարձր որակավորում ունեցող կադրերին պետական համակարգ բերելու և երկարաժամկետ նրանց հետ համագործակցելու խնդիր: Իսկ ներկայիս աշխատավարձերի չափերն այդ հնարավորությունները մեզ չեն տալիս: Բայց մյուս կողմից պետք է հստակ չափորոշիչներ լինեն, որպեսզի էնպես չստացվի, որ լավ աշխատողներն էլ, վատ աշխատողներն էլ նույնչափ վարձատրվեն: Այսինքն՝ ամբողջ համակարգը լուրջ վերանայման կարիք ունի»:
Պատգամավորն ասաց, որ ինքն անձամբ փորձելու է պարզաբանումներ ստանալ կառավարությունից, բայց ոչ հրապարակավ. «Ես անպայման փորձելու եմ պարզաբանել այս հարցը, բայց ոչ ամբիոնից, որովհետև դա մեր թիմի ներքին որոշումն է»:
Լրագրողները փորձեցին ճշտել` արդյոք պատգամավորների աշխատավարձերը նման գաղտնի պայմաններում չեն բարձրանա: Թունյանը բացասական պատասխան տվեց, այնուամենայնիվ, պարզաբանեց. «Եթե նախարարների աշխատավարձերը բարձրանում են, ենթադրաբար պետք է պետական համակարգի մնացած աշխատողների աշխատավարձերը համամասնաբար բարձրանան, որովհետև ամբողջ համակարգը փոխկապակցված է»:
ՈՒՂԻՂ ԵԹԵՐ
Ամենադիտված 
«Մարինան նույնպես չկարողացավ հաղթել այդ չարիքին». Իրինա Թովմասյանը ցավալի լուր է հայտնել
