Նաիրի Հունանյանին լիարժեքորեն արտահայտվելու հնարավորություն պետք է տրվի (տեսանյութ)

«Լուսավոր Հայաստան» խմբակցության պատգամավոր Տարոն Սիմոնյանը լրագրողների հետ զրույցում անդրադարձել է Նաիրի Հունանյանի դիմումին և Արսեն Բաբայանի ձերբակալությանը:

Ըստ պատգամավորի` Նաիրի Հունանյանն օգտվել է իր իրավունքից, այնպես, ինչպես յուրաքանչյուր ՀՀ քաղաքացի կարող էր օգտվել. «Հունանյանի դիմումն օրինաչափ է, բայց դա դեռ չի նշանակում, որ այն պետք է իրացվի: Հանրությունը պատրաստ չէ այդ անձի ազատությունն այլ պատժատեսակով փոխանակելու»:

Սիմոնյանի կարծիքով՝ Հունանյանի դիմումի հիմքում որևէ նորություն հայտնելու միտում չկա. «Եթե ասելիք ունենար, կասեր, բայց, եթե հիմա էլ հայտարարություն ունենա անելու, նրան ոչ ոք չի խանգարի, ընդհակառակը նրան հնարավորություն պետք է տրվի լիարժեքորեն արտահայտվելու, քանի որ հանրությունը բազմաթիվ հարցերի պատասխաններ դեռ չունի, մեզ բոլորիս տանջում են այդ հանցագործության հետ կապված կասկածները»: Անդրադառնալով նաև ԱԺ աշխատակազմի ղեկավարի նախկին տեղակալ Արսեն Բաբայանի ձերբակալությանը՝ պատգամավորն ասաց. «Այն հոդվածը, որի հիման վրա տեղի է ունեցել ձերբակալությունը, համաներման տակ ընկնող հոդված էր և բնականաբար այդ ձերբակալությունը չպետք է տեղի ունենար, և, եթե տեղի է ունեցել թյուրիմացության արդյունքում, նրան պետք է անհապաղ ազատ արձակեին: Հիմա ես ինչքանով որ տեղյակ եմ, հոդվածը փոխվել է: Նոր հոդվածը չի ընկնում համաներման տակ: Այս դեպքում արդեն քաղաքական հետապնդման հարց չի կարող ծագել, քանի որ իրավական դաշտում դեռևս տեղավորվում է»:

Սիմոնյանը հավաստեց, որ եթե հետագայում, Բաբայանի գործը որևէ ձևով դուրս գա իրավական դաշտից, իրենք կբարձրաձայնեն այդ մասին, ինչպես երեկ բարձրաձայնեցին: