Դատարանը մերժեց Դավիթ Սանասարյանին՝ պաշտոնին վերականգնելու պաշտպանների միջնորդությունը

Երևանի ընդհանուր իրավասության դատարանի դատավոր Դավիթ Բալայանը մերժեց ՊՎԾ պետ (լիազորությունները կասեցված) Դավիթ Սանասարյանի պաշտպանների միջնորդությունը, որով վերջիններս առաջարկում էին վերացնել Սանասարյանի լիազորությունները կասեցնելու որոշումը և նրան վերականգնել պաշտոնին։

«Ի սկզբանե՝ այդ որոշումն անհիմն և ապօրինի է կայացվել, քանի որ որևէ ողջամիտ, փաստարկված տվյալ չի ունեցել նախաքննության մարմինը, որ Դավիթ Սանասարյանն իր պաշտոնական դիրքը կարող է օգտագործել գործով անցնող անձանց վրա անօրինական ազդեցություն գործադրելու համար։ Զուտ վերացական, ձևական դատողություններով պաշտոնավարումը կասեցվել է, ինչը հակասում է Մարդու իրավունքների եվրոպական նախադեպային պրակտիկային։ Հարկադրանքի այն միջոցը, որը ժամանակին կիրառվել է, այսօրվա դրությամբ առերևույթ իրեն սպառել է»,- ասաց պաշտպան Արսեն Սարդարյանը:

Սակայն դատախազությունն առարկեց միջնորդությունը՝ ասելով, որ Սանասարյանը կարող է պաշտոնին վերականգնվելով ազդել գործի արդարացի քննության վրա։