Սխալ ստորակետ դնելու պատճառով քրգործ են բացում Արա Բաբլոյանի դեմ․ Վազգեն Մանուկյան

«Մեր հասարակությանն այսպես բզկտված դեռ չէի տեսել․ իրար նկատմամբ թույնով լցված, արժեքավոր մարդկանց դեմ քրեական գործեր հարուցելով։ Արա Բաբլոյանի դեմ հարուցված քրգործը զարմանք է առաջացնում։ Հայաստանի լավագույն բժիշկներից մեկը, որով հպարտանում ենք աշխարհով՝ մեկ էլ լսում ենք, որ սխալ ստորակետ դնելու պատճառով քրգործ են բացել նրա դեմ։ Հանում են Ղարաբաղի լավագույն նախարարներից մեկին՝ պաշտպանության նախարարին, որը ճիշտ նախադասություն չի ասել իրենց կարծիքով։ Անարժեք մարդիկ  հետապնդում են այս պետության համար մեծ ջանքերով, մեծ արդյունքների հասած մարդկանց, որոնք հիմա գտնվում են հարվածի տակ։ Մի խայտառակություն էլ «Հոկտեմբերի 27»-ի գործն է։ Քաղաքական գործ են բացում ամենաամոթալի ձևով, անարժան մարդկանց ձեռքով»,- այս մասին այսօր լրագրողների հետ զրույցում ասաց Հանրային խորհրդի նախագահ Վազգեն Մանուկյանը, ով ընդդիմադիր դիրք է զբաղեցնում և մի շարք գործիչների հետ ստեղծել է «Վերնատուն» քաղաքական-հասարակական ակումբը։ 

Նա հարց բարձրացրեց՝ այս պայմաններում ինչպիսի՞ն պետք է լիներ Հայաստանը․ «Հեղափոխությունից հետո միշտ փրփուր է առաջանում․ անարժան մարդիկ փորձում են պղտոր ջրում ձուկ որսալ։ Երբ նայում ես, թե ինչ է կատարվում աշխարհում և ինչ է կատարվում Հայաստանում, տեսնում ես, որ չի համընկնում ինչ-որ բան։ Համընդհանուր գլոբալիզացիայի, ինտեգրացիայի պայմանները փոխվել են նոր պայմանների։ Աշխարհը մտնում է նոր փուլի մեջ և թվում էր, թե մենք պետք է դրա վրա կառուցեինք մեր քաղաքականությունը, որովհետև սկսում են նոր մարտահրավերներ և նոր հնարավորություններ»,- նշեց Մանուկյանը։

Անդրադառնալով Արցախի հարցին՝ Մանուկյանը նկատեց, որ բանակցություններ չկան․ «Բանակցությունները նպաստում են, որ պատերազմ չլինի և 20 տարի ստատուս քվոն հաջողվեց պահպանել՝ վարելով բանակցություններ։ Երբ բանակցությունները վերանում են, պատերազմ սկսելու հավանականությունը մեծանում է»,- ասաց Հանրային խորհրդի նախագահը։