Հայաստանի հավաքականի բասկետբոլիստը կազատվի պարտադիր զինվորական ծառայությունից

Բասկետբոլի Հայաստանի ազգային հավաքականի անդամ Արագադ Աբրամյանը կազատվի շարքային կազմի պարտադիր զինվորական ծառայությունից: Այդ մասին որոշման նախագիծն ընդգրկված է կառավարության հոկտեմբերի 31-ի նիստի օրակարգում:   

Ըստ հիմնավորման, որոշման նախագծի ընդունումը պայմանավորված է այն հանգամանքով, որ Արագադ Աբրամյանին կառավարության 2018 թվականի փետրվարի  1-ի № 85-Ա որոշմամբ  տարկետում է տրվել մինչև 2019 թվականի ամառային զորակոչը։ Քանի որ Արագադ Աբրամյանի 27 տարին լրացել է 2019 թվականի հուլիսի 8-ին, հնարավոր չէ նրան  շարքային կազմի պարտադիր զինվորական ծառայության զորակոչից տարկետում տալ։ Հետևաբար անհրաժեշտություն է առաջացել բասկետբոլի Հայաստանի հավաքականի անդամին ազատել  շարքային կազմի պարտադիր զինվորական ծառայությունից։

Աբրամյանը հավաքականում աչքի է  ընկնում արդյունավետ խաղով, կարևորվում է բասկետբոլի Հայաստանի Հանրապետության հավաքականի կազմում Արագադ Աբրամյանի  մասնակցությունը Եվրոպայի առաջնության ընտրական խաղերին։