Տեղադրվել է Յուրի Վարդանյանի մահարձանը. փորձել են ստանալ մարզիկի առասպելական կերպարը

Կոմիտասի անվան պանթեոնում տեղի ունեցավ սպորտի վաստակավոր վարպետ, օլիմպիական չեմպիոն, աշխարհի և Եվրոպայի բազմակի չեմպիոն Յուրի Վարդանյանի մահարձանի բացման արարողությունը: Միջոցառմանը ներկա էին ընտանիքի անդամներ, ընկերներ, պաշտոնատար անձինք: 

«Յուրի Վարդանյան անունը լսելիս արդեն հպարտություն ես ապրում, քանի որ նա այն մարզիկն է, ով իր գործով մեծ հետք է թողել Հայաստանի պատմության մեջ: Ճիշտ է, մոտ մեկ տարի է, նա մեզ հետ չէ, բայց նրա անունը շարունակում է նույն հնչեղությամբ ապրել մեզ հետ: Նրա վաստակն ու նվաճումները շարունակում են կրթել սերունդներ, նրան ցանկանում են նմանվել: Մենք չենք կարող ուրանալ Յուրի Վարդանյանի ավանդն ու ներդրումը Հայաստանում սպորտի զարգացման մեջ»,-իր խոսքում նշեց Կրթության, գիտության, մշակույթի և սպորտի նախարարի տեղակալ Գևորգ Լոռեցյանը: 

Միջոցառմանը ներկա էին նաև Յուրի Վարդանյանի գործընկերները: Նրանցից Լևոն Ջուլֆալակյանը մասնավորապես նշեց. «Նա առաջնահերթ լավ մարդ էր, լավ ընկեր: Իհարկե, բոլորը գիտեն նրա սպորտային գորչծունեության մասին, բայց ուզում եմ հատուկ նշել, որ նա շատ լավ մարդ էր: Ցավում եմ, որ այսքան շուտ կյանքից հեռացավ»:

Ջուլֆալակյանը նաև ընդգծեց, որ Վարդանյանը լեգենդար մարզիկ էր, ով իր անցած ճանապարհով պատմություն է կերտել, որը մնալու է դարերով. «Նրա արած գործով մեզ աշխարհն է ճանաչում: Նրա անունը կմնա ոչ միայն Հայաստանի սպորտի պատմության մեջ, այլ նաև ամբողջ աշխարհի: Սա է պատճառը, որ նա օրինակ է եղել: Նրան փորձել են նմանվել, կրկնել նրա հաջողություները»:

Քանդակի հեղինակը ՀՀ վաստակավոր նկարիչ, քանդակագործ Դավիթ Մինասյանն է: Արձանը բրոնզից է: Ստեղծվել է 2-3 ամսվա ընթացքում:

«Մենք փորձեցինք ստանալ Յուրի Վարդանյանի երիտասարդ տարիները: Այն տարիները, երբ նա դարձավ ազգի հերոս: Ուզում էինք, որ նա լիներ, ոչ թե որպես մարզիկ, այլ փորձեցինք ստանալ նրա լեգենդար, առասպելական կերպարը: Նրան հենց այդպես էին ճանաչում: Նրան այդպես սիրեցին ու նույնիսկ Սասունցի Դավիթ էին ասում»,- ասաց քանդակագործը:

Մինասյանը ընդգծեց, որ իր գլխավոր նպատակը Յուրի Վարդանյանի մեծահոգի ժպիտն  ու դեմքի արտահայտությունը ստանալն էր. «Դա իմ առաջարկն էր, որը ընտանիքի անդամները սիրով ընդունեցին: Փորձեցինք մեր լեգենդար մարզիկին «չտխրեցնել»: Իհարկե, աշխատանքի ընթացքում որոշ փոփոխություներ արվեցին, բայց դրանք աննշան շտկումներն էին»:

Նշենք, որ կիսանդրին ստեղծվել է Յուրի Վարդանյանի ընտանիքի նախաձեռնությամբ: