ՀԱՊԿ անդամ պետությունների դեսպանները Երևանում քննարկեցին կառույցի առջև առկա մարտահրավերները

Հավաքական անվտանգության պայմանագրի կազմակերպության անդամ պետություններ Ռուսաստանի, Ղազախստանի և Բելառուսի դեսպանները Հայաստանում կարևորում են կազմակերպության գոյությունն անդամ երկրների կյանքում: Այս մասին դեսպանները հայտնեցին նոյեմբերի 4-ին կայացած «ՀԱՊԿ դերը տարածաշրջանային անվտանգության ապահովման գործում» թեմայով քննարկման ընթացքում:

«ՀԱՊԿ կառուցվածքի տարբեր մարմինները կազմակերպության գործունեության այս տարիների ընթացքում կուտակել են փոխգործակցության մեծ փորձ: Այս գործում մեծ դեր է խաղում Հավաքական անվտանգության պայմանագրի կազմակերպության խորհրդարանական վեհաժողովը»,- ասաց Հայաստանում Ռուսաստանի Դաշնության դեսպան Սերգեյ Կոպիրկինը:

Հայաստանում Բելառուսի դեսպան Իգոր Նազարուկը հայտնեց, որ տարիների ընթացքում ընդլայնվել է ՀԱՊԿ գործունեության շրջանակը և փոխվել են կառույցի առջև ծառացած մարտահրավերները:

«Այս շրջանում մեր ուշադրության կենտրոնում են գտնվում միջազգային ահաբեկչությունը, թմրաշրջանառությունը, անօրինական միգրացիան, կիբերանվտանգությունն ու այլ հարցեր: Սրանք կոնկրետ խնդիրներ են, որոնք ծառացած են մեր կազմակերպության ու երկրների առաջ»,- նշեց Նազարուկը։

Ղազախստանի դեսպան Թիմուր Ուրազաևը նշեց, որ չէր ցանկանա, որպեսզի գործնականում փորձարկվեր Հավաքական անվտանգության պայմանագրի կազմակերպության արդյունավետությունը:

«Ես չէի ցանկանա, որպեսզի գործնականում ստուգվեր ՀԱՊԿ-ի արդյունավետությունը: Որովհետև դա հղի է շատ մեծ ռիսկերով մեր բոլոր երկրների համար, անկախ նրանից` ուղղակի, թե անուղղակի ենք մենք ներգրավված տարածաշրջանային հակամարտություններում»,- ասաց Ուրազաևը:

Նոյեմբերի 5-ին Երևանում տեղի կունենան Հավաքական անվտանգության պայմանագրի կազմակերպության խորհրդարանականվեհաժողովի խորհրդի նիստն ու ՀԱՊԿ խորհրդարանական վեհաժողովի 12-րդ լիագումար նիստը: