Հերթ կանգնեք, ժողովուրդ ջան, բոլոր հարցերը լուծվելու են, բայց ոչ զոռբայությամբ․ Փաշինյան (տեսանյութ)

 Վարչապետ Նիկոլ Փաշինյանը կառավարության նիստի սկզբում նշեց, որ գործադիրն իր գործունեության ընթացքում բախվում է սոցիալ-հոգեբանական կամ քաղաքակրթական մի շարք խնդիրների: «Երբ մի սուբյեկտի, մի խմբի, մի բնակավայրի խնդիր լուծում ենք, պարտադիր չուզող հարևանի տրամաբանությամբ հայտնվում է մեկ այլ խումբ, բնակավայր, սուբյեկտ, որ ասում է՝  ինչո՞ւ իր հարցը լուծեցիք, ոչ թե մերը: Սա իրականում քաղաքակրթական ու սոցիալ-հոգեբանական խնդիր է: Երբեմն տպավորություն է ստեղծվում, որ ավելի լավ է ոչ մի բան չանել, որպեսզի բոլորը հանգիստ համակերպված հուսահատության հետ իրենց յուղի մեջ տապակվեն: Սա լուրջ խնդիր է, որովհետև 30 տարի կուտակված խնդիրները մեկ գործողությամբ  հնարավոր չէ լուծել: Եթե փորձենք այդպես լուծել, շատ արագ երկիրը կկանգնի կոլապսի առաջ»,-  ասաց Վարչապետը՝ ավելացնելով, որ Հայաստանը երբեք էլ ուժեղ չի եղել շատ պրիմիտիվ մի քաղաքակրթական մեխանիզմում՝ հերթ կանգնելու գործում: Նիկոլ Փաշինյանի խոսքով՝ բոլորն աշխատել են առաջինը վազել և բռնել այդ ծառայություն մատուցողի կոկորդից, որ առաջինը հենց իրենց մատուցի ծառայությունը:

«Սա լուրջ քաղաքակրթական խնդիր է, և ես ուրախ եմ, որ Հայաստանում սկսվել է տարածվել, մասնավորապես, բանկային համակարգում հերթ  արձանագրող սարքեր են դրվել: Մենք պետք է բոլոր այն տեղերում, որտեղ նման խնդիր կա, պարտադիր դարձնենք հերթագրող մեքենաների  տեղադրումը»,- նշեց Վարչապետը: