Ատոմակայանում աշխատավարձերի բարձրացում չի սպասվում․ միջին աշխատավարձը 360 հազար դրամ է

Այս տարվա ընթացքում աշխատողների աշխատավարձերի 10-20 %-ով բարձրացում է եղել։ Այս մասին այսօր լրագրողների հետ զրույցում ասաց Հայկական Ատոմային էլեկտրակայանի տնօրեն Մովսես Վարդանյանը։ 

«Աշխատավարձերի բարձրացումով պայմանավորված՝ նախկին 300 հազար դրամի փոխարեն հիմա մեզ մոտ միջին աշխատավարձը 360 հազար դրամ է։ Եթե որևէ մեկը կարող է ասել, որ իր աշխատավարձն իրեն բավարարում է, պետք չէ բարձրացնել, ես չեմ հավատա, դրա համար նորմալ երևույթ է, որ բողոքում են»,- ասաց տնօրենը՝ անդրադառնալով աշխատավարձերի վերաբերյալ աշխատողների բողոքներին։

Նրա խոսքով՝ աշխատավարձերը բարձրացել են օպտիմալացման և այլ միջոցների հաշվին․ «Այսօր ատոմակայանի ֆոնդը գերազանցում է սակագնային միջոցներով նախատեսված աշխատավարձի ֆոնդը։ Ատոմակայանն  իր դրամական հոսքերի կառավարման շնորհիվ առաջացած լրացուցիչ եկամուտներից վերավճարում է այդ լրացուցիչ աշխատավարձերը»,- նշեց նա։ 

Անդրադառնալով հարցին, թե ինչո՞ւ են աշխատավարձերը ցածր՝ ատոմակայանի ներկայացուցիչը նշեց․ «Աշխատավարձերը, միգուցե, ավելի ցածր են ռուսական կայանների աշխատավարձերից։ Այսօր մենք շահագործում ենք 2 բլոկանի ատոմակայան, անձնակազմը նախատեսված է 2 բլոկի համար, բայց աշխատում է մեկ բլոկը, եթե աշխատեր երկրորդ բլոկը, ապա 60-80 անձով կավելանար ներկայիս 1655 հոգանոց անձնակազմին։ Էներգոհամակարգում ամենաբարձր ատոմային էլեկտրակայանի աշխատավարձերն են, մնացած բոլոր էներգոհամակարգի ընկերություններում միջին աշխատավարձը 200 հազար դրամ է»,- ասաց նա։