Ալեն Սիմոնյանը հանրապետական նախկին պատգամավորների հետ զրույցից գաղտնիք բացեց

«Հայաստանը զավթված է եղել Սերժ Սարգսյանի ու Ռոբերտ Քոչարյանի կողմից»,- ասաց ԱԺ փոխնախագահ Ալեն Սիմոնյանը` հակադարձելով իր քաղաքական թիմի հասցեին ընդդիմադիրների կողմից հնչեցված այն քննադատություններին, թե իշխանությունն այսօր զավթված է։

«Նախկինում ստեղծված է եղել մի Հայաստան, որը պիտի սպասարկեր մեկ Սերժ Սարգսյանին, մեկ Ռոբերտ Քոչարյանին: Այդ սպասարկման համակարգի մի մասն է հանդիսացել նաև դատական համակարգը, այն լիովին ստեղծված է եղել այդ ռեժիմը սպասարկելու համար։ Սրա պատճառով էլ նաև դուք՝ լրագրողներդ, կամ միջազգային կառույցներ հնչեցրել են միտքը, որ ՀՀ-ում կան քաղբանտարկյալներ»,-ասաց Ալեն Սիմոնյանը։

Սիմոնյանը պնդեց, որ տնտեսական ոլորտում սեփականատերեր փոխելու, դատավորներին Բաղրամյան 26-ից զանգելու արտահայտությունները մինչև իր և իրենց քաղաքականության մեջ մտնել են եղել շրջանառության մեջ: Ալեն Սիմոնյանը պնդեց այն միտքը, որ դատական համակարգում մեծ խնդիր կա, և, որ համակարգի գերակշիռ մասը ենթակա է վերանայման։ Հիշեցնելով նախորդ տարվա հոկտեմբերի 2-ի դեպքերը, Ալեն Սիմոնյանն ընդգծեց, որ այդ օրը փորձ է արվել ԱԺ կանոնակարգ օրենքի փոփոխությամբ խոչընդոտել վարչապետի նոր ընտրությունը։

«Մի գաղտնիք բացեմ, որ հոկտեմբերի 2-ից մի քանի օր առաջ ԱԺ-ում տոնակատարություն էր՝ խորհրդարանի 100-ամյակի հետ կապված։ Այդ ժամանակ ՀՀԿ-ական պատգամավորներից երկուսն ինձ ասացին, որ ոչինչ, քիչ մնաց, քանի որ մենք ձեզ թերագնահատեցինք, բայց հիմա դուք եք մեզ թերագնահատում, կտեսնենք, թե ինչ կլինի։ Այդ ժամանակ չհասկացա` ինչի մասին է խոսքը, բայց եղավ հոկտեմբերի 2-ը, որի ժամանակ փորձ արվեց կանգնեցնել ՀՀ-ում սկսված շարժումը։ Հիմա կա դատական համակարգի խնդիր, որը փաստում են ոչ միայն իշխանության ներկայացուցիչները: Նույն ԲՀԿ-ն խոսում է այն մասին, որ ՍԴ դատավորներն իրենց աչքի լույսը չեն, դատավորներն էլ ասում են, որ կան խնդիրներ, բայց, երբ քայլ է արվում որևէ հարցի լուծում տալ, չգիտեմ, թե ինչու՝ շահարկվում է հարց, թե իշխանությունը գնում է նման քայլի, որ իրենց համար շահեկան դատական համակարգ լինի»,-ասաց Սիմոնյանը։

Նա նաև նշեց, որ, եթե նպատակ ունենային դատական համակարգն իրենց շահեկան դարձնել, ապա կգնային այդ քայլին, քանի որ դատական համակարգը պատրաստ էր իրենց սպասարկել, բայց իշխանությունը դրանից հրաժարվել է, և այս գործընթացը դրա ապացույցն է: Ըստ նրա՝ դատական համակարգում, իհարկե, կան նաև արդար և ազնիվ դատավորներ և հնչեցված կարծիքները ոչ բոլոր դատավորների մասին են:

Ազգային ժողովը 2018-ի հոկտեմբերին ժամը 19:30-ն արտահերթ նիստում 67 կողմ ձայնով ընդունել էր Ազգային ժողովի կանոնակարգ-օրենքում փոփոխություններ կատարելու մասին օրենքի նախագիծը, որի համաձայն՝ Ազգային ժողովի նիստի աշխատանքները որևէ պատճառով խոչընդոտելու դեպքում այն կարող է ընդհատված համարել: ԱԺ-ն նախագիծն ընդունել էր բողոքի ցույցերի ներքո: ԱԺ նիստի ընթացքում խորհրդարանի շենքի դիմաց բազմաթիվ քաղաքացիներ, լսելով ՀՀ վարչապետ Նիկոլ Փաշինյանի կոչը, հավաքվել են իրենց բողոքն արտահայտելու այդ նախագծի դեմ: Քվեարկությունն իրականացվել էր ոչ քարտերով, այլ ձեռքով: Նախագծին կողմ էին քվեարկել ՀՀԿ-ն, ԲՀԿ-ն ու ՀՅԴ-ն: