Դատավորին ասում են` քանի որ լավը չեք, մենք ձեզ չենք հավանում, եկեք փող տանք, դուք գնացեք․ Տարոն Սիմոնյան

ԱԺ փոխնախագահ Ալեն Սիմոնյանն, անդրադառնալով Սահմանադրական դատարանի դատավորների վաղաժամ կենսաթոշակային համակարգի ներդրման օրենքին, հայտարարել էր, որ այս նախագծով իրենք ձեռք են մեկնում ՍԴ դատավորներին: Այսօր ԱԺ ճեպազրույցների ընթացքում «Լուսավոր Հայաստան» խմբակցության պատգամավոր Տարոն Սիմոնյանը հույս հայտնեց, որ իշխանության մեկնած ձեռքը դատավորները չեն սեղմի:

«Երբ մենք դատավորների քանակի ավելացման հարց ենք բարձրացրել, իշխանությունից հայտարարել են, որ բյուջեում գումար չկա և սպասում են, որ ինչ-որ տեղից բարեգործ մարդիկ գումարներ տան: Մինչդեռ մեր ունեցած գումարը մենք անխնա բաժանում ենք, ինչ է թե մեկ դատավոր գնա թոշակի։ Սա որևէ կերպ տրամաբանական չէ: Ես այստեղ բարոյական առումով խնդիր եմ տեսնում, որովհետև դատավորները բարձր պրոֆեսիոնալիզմ ունեցող անձինք են: Դատավորին ասում են` քանի որ լավը չեք, մենք ձեզ չենք հավանում, եկեք փող տանք, դուք գնացեք: Ստացվում է այնպես, որ դատավորներն, ըստ էության, վաճառում են իրենց մասնագիտական բարոյականությունը փողի դիմաց: Ես հույս ունեմ, որ ոչ մի դատավոր այս մեկնած ձեռքը չի սեղմի։ Մեր իշխանությունը կարճ մտածելակերպ է որդեգրել, որովհետև երկար մտածող իշխանությունը չէր ձգտի իր իշխանության տակ պահել մյուս երեք իշխանությունները, այդ թվում նաև չորրորդ իշխանությունը»,-ասաց Սիմոնյանը:

Նա նշեց, որ գործող իշխանությունը ցանկանում է նախագահ ունենալ ամեն տեղ, և այդ ցանկությունը ոչ մի կերպ չի էլ թաքցնում: «Եկած հեղափոխական ուժերը, փորձում են անել նույն բանը, ինչ՝ նախորդները: Դա կարող է հղի լինել շատ վատ հետևանքներով, այստեղ հեռատեսություն է պետք, որ երկրի շահը գերակա համարվի կուսակցական նեղ շահերից»,-ասաց Սիմոնյանը:

Անդրադառնալով ՍԴ դատավորների վաղաժամ կենսաթոշակային համակարգի ներդրման արդեն իսկ ընդունված օրենքին` պատգամավորն ասաց, որ ահմանադրական դատարանի նախագահ փոխելով՝ իշխանությունը չի կարող վերահսկողություն հաստատել ՍԴ-ի վրա, քանի որ դա կոլեգիալ մարմին է: «Կան խնդիրներ ամբողջ դատական համակարգում, այդ թվում՝ Սահմանադրական դատարանում նրանց աշխատանքի անարդյունավետության առումով, բայց դա անվանել ճգնաժամ չի կարելի: Մենք ինստիտուցիոնալ լուծումները տեսնում ենք Սահմանադրական փոփոխությունների ճանապարհով, ոչ թե հարկադիրի հաշվին թոշակի ուղարկելով, այն էլ մարդկանց, որ այդ թոշակը չեն վաստակել»:

«Լուսավոր Հայաստան» խմբակցության պատգամավորները նորից առաջ քաշեցին Սահմանադրական հանրաքվե անցկացնելու գաղափարը: Պնդեցին, որ հանրաքվեով միայն վերջապես կհաստատվի այնպիսի Սահմանադրություն, որը կլինի լեգիտիմ և ամբողջությամբ կարտահայտի ժողովրդի կամքը: «2015 թ-ի Սահմանադրական փոփոխությունները չեն արտահայտում ժողովրդի կամքը և լեգիտիմ չեն: Այս մասին բազմիցս խոսել են հենց մեր գործող իշխանության ներկայացուցիչները, իսկ հիմա իրենք են ամրագրում այդ Սահմանադրությունը: Ժողովրդի կամքը, սիրելի գործընկերներ, ձեր շուրթերով չի արտահայտվում, ժողովրդի կամքը հանրաքվեով է արտահայտվում: Հանրաքվե արեք, ձևավորեք լեգիտիմ Սահմանադրություն և այդ Սահմանադրությանը համահունչ փոխեք և Սահմանադրական դատարանը, և Վճռաբեկը: Թե չէ այս ճանապարհները ձեզ տանում են ձախողման»: