Ականավոր հետախույզ Գոհար Վարդանյանը հետմահու պարգևատրվեց Պատվո շքանշանով

Ականավոր հետախույզ Գոհար Վարդանյանը անվտանգության մարմիններում երկարամյա անբասիր գործունեության, հայրենիքին մատուցած բացառիկ ծառայությունների և անմնացորդ նվիրումի համար հետմահու պարգևատրվեց Պատվո շքանշանով: Շքանշանը Հայաստանի Հանրապետության Ազգային անվտանգության ծառայության 101-րդ տարեդարձի առթիվ տեղի ունեցած նիստում ՀՀ վարչապետ Նիկոլ Փաշինյանը հանձնեց ԱԱԾ տնօրենի պարտականությունների ժամանակավոր կատարող Էդուարդ Մարտիրոսյանին:

Գոհար Լևոնի Վարդանյանը կյանքից հեռացել է նոյեմբերի 25-ին, 94 տարեկան հասակում:

Ականավոր խորհրդային ընդհատակյա հետախույզ, Ռուսաստանի արտաքին հետախուզության ծառայության վետերան Գոհար Վարդանյանը ծնվել է 1926 թվականին: 1930-ական թվականների սկզբին նրա ընտանիքը տեղափոխվել է Իրան: 16 տարեկանում նա մտել է՝ իր զինակից Գևորգ Վարդանյանի, ով հետ իր ամուսինն է դառնում, հակաֆաշիստական խումբ, որի հետ մեկտեղ ակտիվ հետախուզական աշխատանք է կատարել:  1943 թվականին այդ խմբի կազմում մասնակցել է Թեհրանի կոնֆերանսի ընթացքում «մեծ եռյակի» ղեկավարների անվտանգության ապահովման գործողությանը: Այդ ժամանակ կանխվել է «մեծ եռյակի» ղեկավարների՝ Ստալինի, Ռուզվելտի և Չերչիլի դեմ հիտլերյան հատուկ ծառայությունների մահափորձը:

1951 թվականին Վարդանյան ամուսինները վերադարձել են ԽՍՀՄ, 1956 թվականին ավարտել են Երևանի օտար լեզուների ինստիտուտը: Այնուհետև Գոհար և Գևորգ Վարդանյաններն «Անիտա» և «Անրի» օպերատիվ կեղծանուններով ընդհատակյա վիճակում հաջողությամբ աշխատել են աշխարհի շատ երկրներում: 1986 թվականին հետախույզները վերադարձել են հայրենիք: Մասնագետների կարծիքով՝ նրանց աշխատանքի արդյունքներն այնքան նշանակալից են, որ երբեք չեն գաղտնազերծվի:  Գոհար Վարդանյանի վաստակը նշվել Է Կարմիր դրոշի, II աստիճանի Հայրենական պատերազմի շքանշաններով և բազմաթիվ մեդալներով: