Նիկոլ Փաշինյանը քաղաքականությունից կիլոմետրերով հեռու է․ Շանթ Հարությունյան (տեսանյութ)

Առանց արժեքների հեղափոխության երկիրը չի կարող ուղղվել։ Այս մասին այսօր՝ դեկտեմբերի 19-ին, լրագրողների հետ զրույցում ասաց «Ցեղակրոն» կուսակցության նախագահ Շանթ Հարությունյանը։

«Անկախացումից հետո ՀՀ բոլոր ղեկավարները՝ Լևոն տեր-Պետրոսյան, Ռոբերտ Քոչարյան, Սերժ Սարգսյան, Նիկոլ Փաշինյան, բոլորը Մոսկվայի դրածոներ են։ Ճիշտ է բոլորն ունեցել են տարբեր ինտելեկտուալ կարողություններ, քաղաքականությանը՝ քաղաքագիտության և պատմության առումով ամենամոտը եղել են Լևոն-Տեր Պետրոանն ու Վազգեն Մանուկյանը, մնացածները կիլոմետրերով հեռու են եղել, «նամեստնիկ-ներ են աշխատել, Նիկոլն էլ ինչ տեսել, դա է սովորել։ Եթե մի ժողովուրդ չի կարողանում տարբերել՝ լավը որն է, վատը որն է, բերեք հույս չունենա, թե կարողանա լավ երկիր կառուցի, ապրի այդտեղ, հատ-հատ փախնելու է, լքելու է հայրենիքը։ Սա է, առանց արժեքների հեղափոխության չի կարող երկիրը դզվել»,-ասաց նա։

Շանթ Հարությունյանի խոսքով՝ «Լենին-Քեմալ» պայմանագիրն այսօր էլի անում են, որովհետև Նիկոլ Փաշինյանը քաղաքականությունից կիլոմետրերով հեռու է․ «Զարմանում են, ինչի այդ մարդիկ չեն գնում ու «քիթները» ռադիոֆիզիկայի մեջ մտցնում, օրինակ Նիկոլը կամ Քոչարյանը։ Իրենց թվում է՞ քաղաքականությունն ավելի «ստից» բան է, քան ռադիոֆիզիկան։ Իրենք այնքան տգետ են, որ այդ ամենը չեն հասկանում։ 4 նախագահ ենք ունեցել, որից 3-ը բանասեր են եղել, ու ինչ արդյունք է եղել, որևէ մեկը քաղաքական գործիչ չի եղել»։

նա նաև կարծիք հայտնեց՝ Նիկոլ Փաշինյանը քաղաքականությունից այնքան է հասկանում, ինչքան կարող է հասկանալ կենսաբանությունից կամ ռադիոֆիզիկայից․ «Մի օր իրեն հարցրեք ռադիոֆիզիկայից: Եթե կարողանա պատասխանել, իմացեք այդքան քաղաքականություն է  հասկանում: Կառավարման մեթոդով մյուս ղեկավարներին մի քիչ գերազանցում էր  Քոչարյանը: Ռուսները վստահում են նրան, եթե պետք է Հայաստանը ռուսական գոտի մնա, գուցե Քոչարյանն ամենահարմարը լինի: Ես չգիտեն: Բայց դեմ եմ իրենց բոլորին»։