Կարճ անդրադարձ է եղել վերջին զարգացումներին. ինչ նամակ է գրել Վենետիկի հանձնաժողովի նախագահը Բադասյանին

Դեկտեմբերի 27-ին Վենետիկի հանձնաժողովից ստացված նամակի գրության և դրա պարունակության վրաբերյալ մեկնաբանություն ստացանք ՀՀ արդարադատության նախարարությունից և ՀՀ վարչապետ Նիկոլ Փաշինյանի մամուլի խոսնակ Վլադիմիր Կարապետյանից: Վերջիններս հայտնեցին, որ գրությունը եղել է անձնական բնույթի և որևէ պաշտոնական նամակ չեն ստացել:

ԼՈՒՐԵՐ.com-ի հետ զրույցում ՀՀ վարչապետի մամուլի խոսնակ Վլադիմիր Կարապետյանը նշեց, որ նամակը վերաբերել է տոների շնորհավորանքներին, որը անձնական բնույթ է կրում, ուստի հրապարակման ենթակա չէ:

Հետաքրքրվեցինք՝ ՍԴ շուրջ ստեղծված իրավիճակի մասին խոսք եղե՞լ է, ի պատասխան՝ Կարապետյանն ասաց. «Կարճ անդրադարձ է եղել վերջին զարգացումների վերաբերյալ, քանի որ ակնհայտ է, որ Վենետիկի հանձնաժողովը ուշադիր հետևում է զարգացումներին ողջ տարածաշրջանում, հատկապես այն երկրներում որտեղ ընթանում են խորքային բարեփոխումներ իրավական դաշտում: Այդ առումով տրամաբանական մեկ-երկու հարցադրում է եղել Վենետիկի հանձնաժողովի նախագահի կողմից: Բայց ոչ մի պաշտոնական հարցումներ չեն եղել»,- նշեց Կարապետյանը:

ՀՀ ԱՆ տեղեկատվության և հասարակայնության հետ կապերի վարչությունից էլ հայտնեցին, որ Արդարադատության նախարարությունը Վենետիկի հանձնաժողովից որևէ պաշտոնական նամակ չի ստացել. «Ինչ վերաբերում է ոչ պաշտոնական գրագրությանը՝ այն հրապարկման ենթակա չէ։ Այդուհանդերձ, տեղեկացնում ենք, որ արդարադատության նախարար Ռուստամ Բադասյանը անձնական նամակով շնորհավորել է Վենետիկի հանձնաժողովի նախագահ Ջիանի Բուքիքիոյին Սուրբ ծննդի և Ամանորի կապակցությամբ, որին ի պատասխան Հանձնաժողովի նախագահը Ռուստամ Բադասյանին ևս շնորհավորել և բարեմաղթանք է հղել տոների առթիվ»,- ասացին ՀՀ ԱՆ տեղեկատվության և հասարակայնության հետ կապերի վարչությունից՝ ընդգծելով, որ ոչ պաշտոնական գրագրություններ հրապարակման ենթակա չեն։

Ավելի վաղ, արդարադատության նախկին նախարար Արփինե Հովհաննիսյանն իր ֆեյսբուքյան էջում գրել էր, որ երեկ արդարադատության նախարարությունում Վենետիկի հանձնաժողովից ՍԴ շուրջ ստեղծված իրավիճակի կապակցությամբ նամակ է ստացվել, որում ոչ միայն բացատրություններ են հայցվում, այլև բավական միարժեք որակումներ են տրվում իշխանությունների գործողություններին։

Սոնա Հարությունյան