«Պետք է արդարադատությունը տոնի իր հաղթանակը». Հովհաննես Ազոյանին ներգրավել են որպես տուժող

Դերասան, հումորիստ Հովհաննես Ազոյանը ֆեյսբուքյան իր էջում գրում է.

«Սիրելի հայրենակիցներ, այս նամակով ակնկալում եմ ձեր քաղաքացիական բարձր գիտակցությունը, քանի որ հունվարի 3-ին տեղի ունեցած դեպքը միայն ինձ չի վերաբերվում, այլ մեզ բոլորիս: Խուլիգանը՝ ով պետք է պատասխանատվության ենթարկվի, կոպիտ ձևով խախտել է հասարակական կարգը՝ իր ծայրահեղ լկտի, խուլիգանական և բոլորի համար վտանգավոր պահվածքով։ Այդպիսի դեպքեր դուք հավանաբար շատ եք հանդիպում կամ հանդիպել ձեր կյանքում։ Սա նախադեպ է, որ պետք է խստագույնս մերժվի հասարակության կողմից, որպեսզի մեր խաղաղ կյանքը ապագայում վտանգված չլինի։ Ինձ ներգրավել են որպես տուժող և Իրավունքներիս պաշտպանությունը այդ քրեական գործով վստահել եմ «AM» իրավաբանական ընկերության պրոֆեսիոնալներին, մասնավորապես՝ փաստաբան Դավիթ Հունանյանի թիմին: Վստահ եմ, որ խուլիգանը պատժվելու է։
Հ.գ Պետք է արդարադատությունը տոնի իր հաղթանակը, որ բոլորս հասկանանք, որ պաշտպանված ենք ոստիկանության և արդարադատության կողմից»։

Հիշեցնենք, որ հունվարի 3-ին Երևանում ծեծի էր ենթարկվել ճանաչված դերասան Հովհաննես Ազոյանը:

Վերջինս ժամը 04:00-ի սահմաններում Հրազդանի կիրճում՝ «Դար 21» հեռուստաընկերության մոտ, ծեծի է ենթարկվել Երևանի բնակիչ, 31-ամյա Լևոն Ղարիբյանի կողմից, ով ձեռքերով հարվածել է Հ. Ազոյանի մարմնի տաբեր մասերին ու գլխին՝ պատճառելով ֆիզիկական ցավ:

Դեպքի վայր է ժամանել ոստիկանության Մալաթիայի բաժնի հետաքննչական խումբը՝ հետաքննչական բաժանմունքի հետաքննիչ Արմեն Սուքիասյանի գլխավորությամբ:

Տեղում Հ. Ազոյանը կատարվածի մասին բացատրություն է տվել և հայտնել, որ ինքն աշխատում է «Ոսկեվազ Վայն Թայմ» ՍՊԸ տնօրեն:

Փաստի առթիվ հետաքննչական բաժանմունքում նյութեր են են նախապատրաստվում:

Հետաքննիչ Ա. Սուքիասյանի որոշմամբ նշանակվել է դատաբժշկական փորձաքննություն: