Բնակարանի ձեռքբերման դեպքում եկամտահարկի վերադարձը պետք է հանել. Հովիկ Աղազարյան

ԱԺ տնտեսական հարցերի մշտական հանձնաժողվում այսօր քննարկվեց և դրական եզրակացություն ստացավ ուսման վարձը եկամտային հարկի տեսքով աշխատող ուսանողին վերադարձնելու օրենքի նախագիծը:

Քննարկման առիթ դարձավ այն հարցը, թե քաղաքացին այս դեպքում իրավունք կունենա ընտրել՝ կրթության, թե՞ բնակարան ձեռք բերելու համար է ուզում օգտագործել եկամտային հարկի վերադարձի իրավունքը:

Այս քննարկման ընթացքում «Իմ քայլը» խմբակցության պատգամավոր Հովիկ Աղազարյանն ասաց, որ բնակարանների դեպքում եկամտային հարկն, առհասարակ, պետք է հանվի. «Ես, որպես քաղաքացի և որպես պատգամավոր, գտնում եմ, որ եկամտահարկի վերադարձը բնակարանային շինարարության հետ կապված մի օր շուտ պետք է հանել, որովհետև մարդիկ կան, որ ունեն բազմաթիվ բնակարաններ ու փոխանակ իրենց աշխատած գումարները դնեն բիզնես սկսեն կամ, եթե բիզնեսի հավես չունեն, դնեն այդ գումարները բանկ, գնում շենքեր են սարքում»:

Հիշեցնենք, որ Հարկային օրենսգրքի 160-րդ հոդվածի համաձայն՝ անմիջապես կառուցապատողից բնակարանի ձեռքբերման կամ անհատական բնակելի տան կառուցապատման նպատակով ստացված հիփոթեքային վարկի սպասարկման համար վճարված տոկոսների գումարների չափով ֆիզիկական անձինք հետ են ստանում իրենց վճարած եկամտահարկի գումարը: Գործընթացը սկսվել է 2015-ի հունիսից և վերաբերում է 2014-ի նոյեմբերի 1-ից հետո ստացված հիփոթեքային վարկերին:

2018-ի հունվարի 1-ից վճարած եկամտահարկը վերադարձվում է նաև ՀՀ տարածքում բնակելի թաղամասերում կամ համալիրներում անմիջապես կազմակերպություն կամ անհատ ձեռնարկատեր կառուցապատողից անհատական բնակելի տուն ձեռք բերելու նպատակով ստացված հիփոթեքի սպասարկման համար վճարվող տոկոսների գումարների չափով: 2019-ի 9 ամսում հիփոթեքային վարկի սպասարկման համար վճարված տոկոսների մասով վերադարձված եկամտային հարկի գումարը կազմել է մոտ 5․45 մլրդ դրամ, ինչը նախորդ տարվա նույն ժամանակաշրջանի ցուցանիշը գերազանցել է 65%-ով։