Սուպերվարչապետական համակարգի դեմ ամենօրյա քայլերով ենք պայքարում. Լիլիթ Մակունց (տեսանյութ)

Կիսանախագահական կառավարման համակարգին վերադառնալուն այսօր լրագրողների հետ զրույցում անդրադարձավ ԱԺ «Իմ քայլը» խմբակցության ղեկավար Լիլիթ Մակունցը: Նա ասաց, որ դրա անհրաժետությունը չի տեսնում: «Այս պահին իմ անձնական կարծիքը կարող եմ ասել՝ նման անհրաժեշտություն չեմ տեսնում, բայց աշխատանքային խումբը պետք է քննարկի և ներկայացնի փաստարկներ, հակափաստարկներ ու դրա արդյունքում կհասկանանք, որ կողմը, ինչ դիրքերից է հանդես գալիս»:

Մակունցը չակերտներ չբացեց և չասաց, թե Սահմանադրական փոփոխությունների վերաբերյալ քննարկումների ժամանակ ինչ հստակ առաջարկներով հանդես կգա «Իմ քայլը»: Լրագրողի հարցին, թե արդյոք օրակագրում կլինի սուպերվարչապետական համակարգից ազատվելը, որի մասին ընդդիմադիր եղած ժամանակ խոսում էր Փաշինյանը, Մակունցն ասաց. «Նիկոլ Փաշինյանը նման արտահայտությամբ նկատի ուներ, օրինակ, կեղծված ընտրությունների կամ ստիպողականության արդյունքում ձևավորված ՏԻՄ իշխանությունը, ինչն այսօր չկա: Սուպերվարչապետական համակարգում մենք ունեինք ընդդիմություն, որը իր լիազորություններում ու գործառույթներով սահմանափակ էր: Ես չեմ հիշում, որ ՀՀ նորանկախ պատմության մեջ ընդդիմությունը լինի այնքան ուժեղ, որքան այսօր է: Այսինքն՝ այն, ինչ մենք անվանել ենք «սուպերվարչապետական համակարգ», չենք սպասում, որ աշխատանքային խումբ ձևավորվի ու դրանով քայլեր ձեռնարկենք դրա դեմ, այլ ամենօրյա քայլերով փորձում ենք հնարավորինս բալանսավորել իշխանությունը և լծակներ տալ ընդդիմությանը»: