«Դյութի ֆրի մարկետ Արմենիա»-ին հողամաս տրամադրելու որոշումը հանվեց օրակարգից

Վարչապետ Նիկոլ Փաշինյանի առաջարկով կառավարության նիստի օրակարգից հանվեց  ՀՀ պետական եկամուտների կոմիտեի Արևելյան մաքսատուն-վարչության Բագրատաշենի մաքսային կետ-բաժնի և Հյուսիսային մաքսատուն-վարչության Բավրայի մաքսային կետ-բաժնի տարածքներից «Դյութի ֆրի մարկետ Արմենիա» սահմանափակ պատասխանատվությամբ ընկերությանը կառուցապատման իրավունքով հողամաս տրամադրելու մասին որոշման նախագիծը:

ՊԵԿ նախագահ Դավիթ Անանյանը նշեց, որ նախագծով նախատեսվում էր Տավուշի մարզի Այրում համայնքի ղեկավարին՝ ՊԵԿ Արևելյան մաքսատուն-վարչության Բագրատաշենի մաքսային կետ-բաժնի և Շիրակի մարզի Աշոցքի համայնքի ղեկավարին՝ ՊԵԿ-ի Հյուսիսային մաքսատուն-վարչության Բավրայի մաքսային կետ-բաժնի կողմից զբաղեցրած և սպասարկման համար հատկացված տարածքներից «Դյութի ֆրի մարկետ Արմենիա» սահմանափակ պատասխանատվությամբ ընկերությանը 49 տարի ժամկետով կառուցապատման իրավունք տալ առանց մրցույթի, տրամադրել համապատասխանաբար՝ 1036 քառ. մետր և 565.3 քառ. մետր մակերեսով հողամասեր:

Վարչապետը խնդիր համարեց, որ հողատարածքն առանց մրցույթի է տրամադրվում:

Վարչապետը կոչ արեց բացառել, որ կառավարության որոշմամբ որևէ հողատարածք տրամադրվի որևէ ընկերության:

ՀՀ փոխվարչապետ Տիգրան Ավինյանը նշեց, որ խնդիրը պետական-մասնավոր համագործակցության օրենքի մեջ է:

Դավիթ Անանյանի խոսքով՝ իրենք նայում են, որ միջազգային փորձ ունենա ընկերությունը: «Մենք կարող ենք մրցույթ հայտարարել, սակայն ունենք չորս ընկերության առաջարկ և ունենք նպատակ չորսին էլ բավարարել»,-ասաց նա:

Վարչապետը նշեց, որ եթե բոլորին էլ նախատեսում են բավարարել, ուրեմն կառավարության որոշմամբ պետք է հողը դրվի աճուրդի, և ով առավելագույն  գումարը վճարի, թող հաղթի: «Ես առաջարկում եմ հիմա սա հանենք օրակարգից, և ով հետաքրքրված է այսպիսի ծառայությամբ թող գա մասնակցի, սահմանենք խիստ աճուրդային պայմաններ, թե ոնց պետք է այդ հողը հասնի ինչ-որ մեկին: Ընդհանրապես, եկեք վերացնենք պրակտիկան, որ կառավարությունը որոշեց հողը առանց մրցույթի տալ»,-ասաց նա: Այսպիսով` հարցը հանվեց օրակարգից, և վարչապետը նշեց, որ սպասում է նոր որոշման քննարկման:

«Դյութի ֆրի մարկետ Արմենիա» սահմանափակ պատասխանատվությամբ ընկերությունը նախատեսում է Բագրատաշենի մաքսային կետ-բաժնի տարածքում անմաքս առևտրի խանութ կառուցելու համար կատարել 2.5 մլն եվրոյի չափով ներդրում, իսկ Բավրայի մաքսային կետ բաժնի տարածքում՝ անմաքս առևտրի խանութ կառուցելու համար՝ մինչև սույն թվականի դեկտեմբեր ամիսը 1.5 մլն եվրո, որոնց արդյունքում ստեղծվելու են ավելի քան 150 աշխատատեղ Բագրատաշենի մաքսային կետ-բաժնի անմաքս առևտրի խանութում և 100 աշխատատեղ Բավրայի մաքսային կետ բաժնի անմաքս առևտրի խանութում: