Սեւանի էկոլոգիական բալանսի վերականգնման նախագծեր կիրականացվեն. ԵՄ պատվիրակության ղեկավար

Ջուրը կենսամակարդակի շատ կարեւոր բաղադրիչ է, եւ պետք է ջանքեր գործադրել, որպեսզի դրա որակն առավելագույնս համապատասխանի քաղաքացիների պահանջներին։ Այս իմաստով «Շրջակա միջավայրի մոնիթորինգի եւ տեղեկատվության կենտրոն» ՊՈԱԿ-ի լաբորատորիան, որը միջազգային կարգավիճակ ունի, կօգնի Հայաստանի կառավարությանը արդյունավետ որոշումներ ընդունել էկոլոգիայի ոլորտում։ Այս մասին լրագրողների հետ զրույցում հունվարի 31-ին ասել է Հայաստանում Եվրամիության պատվիրակության ղեկավար Անդրեա Վիկտորինը։

«Հայաստանի համար շատ կարեւոր նշանակություն ունի Սեւանի ջրի որակը, որը երկրի ամբողջ էկոլոգիական վիճակի ցուցանիշն է։ Բացի այդ, լիճը միաժամանակ Հայաստանի թոքերն է։ Ուստի, «Եվրոպական միության ջրային նախաձեռնություն՝ գումարած Արեւելյան գործընկերության երկրների համար» (ԵՄՋՆ+) ծրագրի շրջանակում նախատեսված է ներգրավել Սեւանի էկոլոգիական բալանսի վերականգնման նախագծեր»,- ավելացրել է Անդրեա Վիկտորինը։

Նա հիշեցրել է, որ էկոլոգիան Եվրոպայի քաղաքականության առաջնահերթ ուղղություններից է, որը փորձում է մինչեւ 2050 թվականը դառնալ կլիմայի առումով չեզոք տարածաշրջան։

Հիշեցնենք, որ Երեւանում հունվարի 31-ին տեղի ունեցավ «Շրջակա միջավայրի մոնիթորինգի եւ տեղեկատվության կենտրոն»  (ՇՄՄՏԿ) ՊՈԱԿ-ի լաբորատորիայի բացման պաշտոնական արարողությունը։