ՀՀ ԱԻՆ կոլեգիայի նիստում ամփոփվել է 2019-ին կատարված աշխատանքը (տեսանյութ)

ՀՀ արտակարգ իրավիճակների նախարարությունում փետրվարի 4-ին կայացել է կոլեգիայի ընդլայնված նիստ, որը վարել է ԱԻ նախարար Ֆելիքս Ցոլակյանը: Նիստը նվիրված էր 2019 թվականի գործունեության արդյունքների ամփոփմանը: Կոլեգիայի նիստին մասնակցել են նախարարության կազմում ընդգրկված բոլոր ստորաբաժանումների ղեկավարները:

Ինչպես տեղեկացրին ՀՀ արտակարգ իրավիճակների նախարարության տեղեկատվության և հասարակայնության հետ կապերի վարչությունից, ելույթով հանդես է եկել ԱԻ նախարար Ֆելիքս Ցոլակյանը: «ԱԻ նախարարը ընդգծեց, որ անցյալ տարին ծանրաբեռնված է եղել բոլոր ուղղություններով և շնորհակալություն հայտնեց նախարարության բոլոր աշխատակիցներին կատարված մեծ աշխատանքի համար:

Հատկապես առանձնացվեց քաղաքացիների նկատմամբ բարեհամբյուր և հարգալից վերաբերմունքի կարևորությունը:

Ֆ. Ցոլակյանը նշեց, որ մշակվում է աշխատանքի գնահատման բալային համակարգ, որի հիման վրա էլ աշխատակիցներն այսուհետ կստանան լրավճարներ:

Անդրադառնալով համակարգում ընթացող կառուցվածքային փոփոխություններին՝ նախարարը հավաստիացրեց, որ Փրկարար ծառայությունում հաստիքները ոչ միայն չեն կրճատվել, այլ նաև՝ պետք է ավելացվեն: Փոփոխությունների արդյունքում կհամալրվեն կանխարգելող և արագ արձագանքող ստորաբաժանումները՝ նպատակ ունենալով բարձրացնել աշխատանքի արդյունավետությունը:

Ցավով հիշատակելով անցյալ տարի հրդեհաշիջման աշխատանքների ժամանակ զոհված հրշեջ-փրկարարի մահը՝ նախարարը նշեց, որ ստորաբաժանումների ղեկավարները պետք է ցուցաբերեն առավելագույն զգոնություն և զգուշավորություն փրկարարների աշխատանքը հնարավորինս անվտանգ կազմակերպելու համար:

Ֆ. Ցոլակյանը շնորհակալություն հայտնեց վետերաններին, հատկապես բարձրահարկ շենքերի հրդեհաշիջման աշխատանքներում մեթոդական աջակցություն ցուցաբերելու և արդյունավետ փորձը նոր սերնդին փոխանցելու համար: Աշխատանքներ են տարվում նաև տեխնիկական վերազինման ուղղությամբ: Օրերս մրցույթ է հայտարարվելու երկու ավտոսանդուղքի «50 և ավելի մետր բարձրության վրա հրդեհաշիջման աշխատանքներ իրականացնելու համար» ձեռք բերման համար: Ընթացքի մեջ է համակարգիչների նոր խմբաքանակի ձեռքբերումը:

-Բարդ աշխատանքային տարի է սպասվում, կլիման չորային է և պետք է պատրաստ լինել բոլոր մարտահրավերներին, բոլոր լավ աշխատակիցները գնահատվելու և խրախուսվելու են, - նշեց նախարարը:

ԱԻ նախարար Ֆ. Ցոլակյանը զեկույցի համար խոսքը տվեց Փրկարար ծառայության տնօրեն, փ/ծ գեներալ-մայոր Վրեժ Գաբրիելյանին: Ծառայության տնօրենը նշեց, որ հաշվետու ժամանակահատվածում «911» ահազանգման կենտրոնում զանգերի քանակը կազմել է 1 միլիոն 817 հազար (2018 թ.-ին՝ 2 միլիոն 13 հազար): 2019 թ. ընթացքում ՀՀ տարածքում գրանցվել է` 20889 արտակարգ դեպք (2018 թ.-ին` 16231), ինչի հետևանքով զոհվել է 427 մարդ (2018 թ.՝ 403), տուժել՝ 12502 (2018 թ.-ին՝ 11213): Հաշվետու ժամանակահատվածում՝ 2018 թ. նույն ժամանակահատվածի համեմատությամբ, դեպքերն աճել են 4658-ով կամ 28.7 %-ով, զոհերի թիվն աճել է 24-ով կամ 6 %-ով, իսկ տուժածներինը՝ 1289-ով կամ 11.5 %-ով: Փրկվել է 363 մարդու կյանք (2018 թ.՝ 301):

2019 թվականի ընթացքում ծառայության ստորաբաժանումների և օպերատիվ խմբերի կողմից արտակարգ դեպքերի, պատահարների հետևանքների վերացման նպատակով իրականացվել է` 28594 ելք (2018 թ.՝ 22725), որից հրդեհների մարման նպատակով իրականացվել է 16413 մեկնում (2018 թ.՝ 10619), փրկարարական և այլ աշխատանքների իրականացման նպատակով՝ 12036 մեկնում (2018 թ.՝ 11934): Ելքերի 1437 դեպքերում գրանցվել են կեղծ կանչեր (2018 թ.՝ 1168), այդ թվում՝ 1292 հրդեհի (2018 թ.՝ 996):

-Այսօր մենք կարող ենք հպարտությամբ ասել, որ փրկարար ծառայության բոլոր աշխատակիցներն ապահովված են համազգեստով և հանդերձանքով, իսկ ստորաբաժանումները՝ անհրաժեշտ քանակությամբ վառելիքահումքային նյութերով, - նշեց Վ. Գաբրիելյանը:

Հաշվետու ժամանակահատվածում հետևողական աշխատանքներ են տարվել արտակարգ իրավիճակների կանխարգելման ուղղությամբ: Իրականացվել է ամենօրյա աշխատանք քաղաքացիական պաշտպանության և բնակչության պաշտպանության համակարգերի նախապատրաստման ուղղությամբ:

Աշխատանքներ են իրականացվել նաև կադրերի ընտրության, ուսուցման և տեղաբաշխման ուղղությամբ: Փրկարարական ծառայություն է ընդունվել 245 քաղաքացի:

-Ընդհանուր առմամբ փրկարար ծառայության փրկարարական և հրշեջ-փրկարարական ստորաբաժանումները կարողացել են իրենց ամենօրյա, տքնաջան, ես կասեի նույնիսկ իրենց անձնազոհ աշխատանքի շնորհիվ անել ամեն ինչ, որպեսզի մեր հանրապետության բնակչությունը լինի առավել պաշտպանված մեր երկրին բնորոշ այնպիսի սպառնալիքներից, ինչպիսիք են հրդեհները, սողանքները, քարաթափումները և տեխնածին բնույթի առանձին աղետները, - ամփոփեց զեկույցը Վ. Գաբրիելյանը:

Այնուհետև զեկույցով հանդես եկավ ԱԻ գլխավոր քարտուղար Վահագն Օհանյանը: ԱԻ գլխավոր քարտուղարը նշեց,որ ՀՀ պետական բյուջեից ԱԻՆ-ին 2019 թ. հատկացվել է 12 մլրդ 631 մլն ՀՀ դրամ գումար, իսկ 2020 թ.՝ 15 մլրդ 308 մլն ՀՀ դրամ, այսինքն՝ 2.7 մլրդ ՀՀ դրամով ավելի: Վերը նշված աճը հիմնականում պայմանավորված է փրկարար ծառայության աշխատակիցների աշխատավարձի և պարգևատրման ֆոնդերի ավելացմամբ: ԱԻ գլխավոր քարտուղարը ներկայացրեց նախարարության գործունեության արդյունքները, ձեռքբերումները, ինչպես նաև՝ մատնանշեց թերություններն ու բացթողումները, որոնք պետք է բացառել 2020 թվականին:

Նյութական պահուստի համակարգի զարգացման բարեփոխումներն ապահովող իրավական դաշտի ստեղծման ու նյութական պահուստի արդիականացման և ընդլայնման նպատակով լրամշակվել, սահմանված կարգով շրջանառվել են օրենքների նախագծեր: Աշխատանքներ են տարվել ՀՀ նյութական պահուստի զարգացման ռազմավարության մշակման ուղղությամբ:

Կնքվել են 3119 արտադրական վտանգավոր օբյեկտներում փորձաքննություն իրականացնելու համար պայմանագրեր, թվով 12253 արտադրական վտանգավոր օբյեկտի սահմանված կարգով տրվել են փորձագիտական եզրակացություններ:

Կատարվել է սեյսմոլոգիական ցանցից ստացվող տվյալների վերլուծություն, երկրաշարժերի հիմնական պարամետրերի որոշում և երկրաշարժերի Ազգային կատալոգի լրացում: Ամենօրյա ռեժիմով կատարվել են ընթացիկ աշխատանքներ՝ դիտացանցի կայանների անխափան աշխատանքն ապահովելու նպատակով: Իրականացվել է առանձին պարամետրերով սեյսմածին անոմալիաների վիճակագրության ուսումնասիրում: ՀՀ տարածքում հետազոտվել և տրվել է տեխնիկական վիճակի և սեյսմիկ խոցելիության մակարդակի գնահատման վերաբերյալ ընդհանուր թվով 108 եզրակացություն: Կատարվել է 40 հանրակրթական դպրոցի և 24 մանկապարտեզի սեյսմիկ ռիսկի բաղադրիչների տվյալների հավաքագրում և վերլուծություն: Սեյսմիկ ռիսկի գնահատման նպատակով շարունակվում են համայնքների քարտեզների թվայնացման և տվյալների բազայի համալրման աշխատանքները:

Զեկույց ներկայացրեց նաև Ճգնաժամային կառավարման պետական ակադեմիայի ռեկտոր, փ/ծ գեներալ-մայոր Հ. Մաթևոսյանը: Հաշվետու ժամանակում ակադեմիայում իրականացվել են աշխատանքներ ղեկավար կազմի և մասնագետների վերապատրաստման, որակավորման բարձրացման, հրշեջ-փրկարարների վերապատրաստման և որակավորման բարձրացման, բարձրագույն և միջին մասնագիտական կրթական ծրագրերով մասնագետների պատրաստման, բնակչության ուսուցման և այլ ուղղություններով: Ճգնաժամային կառավարման պետական ակադեմիայում ներկա դրությամբ բակալավրի կրթական ծրագրով սովորում է 819 ուսանող, մագիստրոսի կրթական ծրագրով՝ 50 ուսանող, իսկ միջին մասնագիտական կրթական ծրագրով՝ 204 ուսանող:

2018-2019 թթ. ընթացքում ԱԻ նախարարության տարբեր ստորաբաժանումներ աշխատանքի է ընդունվել ակադեմիայի շուրջ 70 շրջանավարտ:

Հ. Մաթևոսյանը նշեց, որ գիտական և փորձարարական մեծ աշխատանքներ են տարվել անօդաչու թռչող սարքերի ոլորտում. ձեռք է բերվել անօդաչու թռչող սարք։ Աշխատանքներ են տարվում ԱԹՍ-ների կիրառումը այս ոլորտում իրականացնելու համար:

Հանդիպման ավարտին ԱԻ նախարարը պատվոգրերով պարգևատրեց 2019 թվականին լավագույնը ճանաչված մի շարք աշխատակիցների, ինչպես նաև՝ կառուցվածքային և առանձնացված ստորաբաժանումների:

2019 թվականի ընթացքում ծառայողական պարտականությունները բարեխիղճ կատարելու, ինչպես նաև մասնագիտական բարձր պատրաստականության համար մի խումբ փրկարար ծառայողներ պարգևատրվեցին վկայագրերով և մեդալներով, իսկ նրանցից 10-ը ստացան դրամական խրախուսում՝ 500 000 դրամի չափով:

-Փառք ու պատիվ հայ փրկարարին, - ամփոփեց նիստը Ֆելիքս Ցոլակյանը»,- ասվում է հաղորդագրության մեջ: