Արտագրություններ պաշտպանություններում. ԲՈԿ-ը մանրամասնում է իր դեմ բացված իրավական գործերը

Բարձրագույն որակավորման կոմիտեն ուշադրությամբ դիտարկում է իրենց ներկայացված յուրաքանչյուր գիտական աշխատանք: Ասուլիսում Բարձրագույն որակավորման կոմիտեի նախագահ Սմբատ Գոգյանը նշեց, որ հայտնաբերել են արտագրությունների մի շարք դեպքեր: Դրանց հետ կապված արդեն ԲՈԿ-ի դեմ դատական գործեր ու վարչական վարույթներ են բացվել:

«Մեկ դեպքը նախարարություններից մեկի ներկայացուցչին է վերաբերում, որը երեք անգամ վարչական վարույթ է հարուցել ԲՈԿ-ի դեմ այն բանի համար, որ մենք չենք հաստատել իր ատենախոսությունը: Կարծես թե չի էլ հերքվում, որ այնտեղ կան մեծածավալ արտագրություններ: Մենք բացահայտել էինք 25 էջ արտագրություն, սակայն երբ նախարարությունում ձևավորված հանձնաժողովն ուսումնասիրեց աշխատանքը, այդ ծավալն ավելացավ: Արտագրությունների ծավալը մեծանում է, սակայն բողոքը մնում է»,-ասաց Սմբատ Գոգյանը՝ նշելով, որ պայքարելու են նման երևույթների դեմ:

Երկրորդ դեպքը եղել է տնտեսագիտությունից, Հայաստանի պետական տնտեսագիտական համալսարանում, երբ աստիճանաշնորհելու գաղտնի քվեարկության ժամանակ հայցորդը չի հավաքել անհրաժեշտ քանակությամբ ձայներ, սակայն մասնագիտական խորհուրդը սխալ որոշում է կայացրել և երաշխավորել է, որ ԲՈԿ-ը նրան հանձնի գիտական աստիճանը հավաստող վկայագիր:

«Քանի որ հայցորդն անհրաժեշտ ձայներ չի ունեցել, հետևաբար, չենք հաստատել աշխատանքը, այլ մերժել ենք: Հիմա գործը դատարանում է, նիստը նախատեսված է մարտի 18-ին: Կհասկանանք, եթե մարդը չի հավաքել բավարար ձայներ, իսկ խորհուրդը սխալ որոշում է կայացրել, արդյոք նա պե՞տք է ստանա աստիճանը հավաստող վկայագիր»,-ասաց Սմբատ Գոգյանը՝ ընդգծելով, որ օրենսդրական բազմաթիվ բացեր, խութեր կան, որոնք թույլ չեն տալիս ԲՈԿ-ին լիարժեք գործել ու որոշումներ կայացնել:

Ներկայացնելով 2019 թվականի իրենց կողմից հաստատած գիտական աստիճանները՝ ԲՈԿ նախագահը նշեց, որ դրանք զգալիորեն նվազել են: 2019 թվականին ԲՈԿ-ը հաստատել է 223 գիտական աստիճան, որոնցից 6-ը դոկտորական, 217-ը՝ թեկնածուական: 2019 թվականին հաստատված աշխատանքները 38 տոկոսով պակաս են եղել: Կտրուկ նվազել են տնտեսագիտության բնագավառի պաշտպանությունները. եթե 2018 թվականին դրանց քանակը եղել է 70, ապա 2019 թվականին՝ 34: 2019 թվականին ավելի շատ պաշտպանություն եղել է տեխնիկական գիտություններից՝ 40, 2018 թվականին՝ 47: Գրեթե բոլոր բնագավառներում արձանագրվել է պաշտպանությունների անկում, աճ նկատվել է դեղագործության ուղղությամբ: Դա Սմբատ Գոգյանը պայմանավորում է ԵՊՀ-ում և Երևանի պետական բժշկական համալսարանում դեղագործության ոլորտում հետազոտությունների աճով:

«Ընդհանուր պաշտպանությունները հաստատելու թվի նվազումը մեզ չի ուրախացրել, բայց կարող եմ ասել, որ ինչ որ քանակով կարողացել ենք վատ գործերի դեմն առնել, և սա դեռ ինստիտուցիոնալ մակարդակի պայքար չէ, այլ մարդկային գործոնով ձևավորված պայքարի արդյունք էր»,- ասաց Սմբատ Գոգյանը՝ հավելելով, որ ինստիտուցիոնալ փոփոխությունների խիստ անհրաժեշտություն կա: