«149.270 ՀՀ դրամի ցուցանիշը մոտ է կատարելությանը»․ ԵՊԲՀ աշխատակազմի ղեկավարը՝ ԱԱԾ բացահայտված չարաշահման մասին

Ազգային անվտանգության ծառայությունը «Երևանի Մխիթար Հերացու անվան պետական բժշկական համալսարան»-ի հիմնադրամում և «Հերացի» արհեստակցական կազմակերպությունում բացահայտել է պաշտոնեական փաստաթղթերի կեղծմամբ և պաշտոնեական դիրքի օգտագործմամբ հափշտակություն կատարելու դեպք:

ԱԱԾ տարածած հաղորդագրության մեջ մասնավորապես նշվում է․ «Ստացված փաստական տվյալների համաձայն՝ «Երևանի Մխիթար Հերացու անվան պետական բժշկական համալսարան» հիմնադրամի աշխատակազմի ղեկավարը, ինչպես անձամբ, այնպես էլ նույն հիմնադրամի տնտեսական վարչության պետի հետ նախնական համաձայնությամբ, 2016-2018 թթ․ ընկած ժամանակահատվածում, կեղծել է պաշտոնեական փաստաթղթեր՝ ՀՀ-ից բացակայող անձի անունից կազմել է վճարովի ծառայությունների մատուցման շինծու պայմանագիր` թիվ 1 հիվանդանոցային համալիրի տարածքում կուտակված աղբը տեղափոխելու վերաբերյալ, այնուհետև՝ փաստացի չկատարված ծառայությունների հանձնման-ընդունման ակտ, որոնց օգտագործմամբ, վատնման եղանակով հափշտակվել է զգալի չափերով գումար: Գործով ձեռք բերված բավարար ապացույցների համակցությամբ հիշյալ 2 անձանց մեղադրանքներ են առաջադրվել ՀՀ քրեական օրենսգրքի համապատասխան հոդվածներով»,- ընդգծելով, որ նախաքննությունը շարունակվում է, միջոցներ են ձեռնարկվում մնացած դրվագներով հանցագործության կատարմանը ներգրավված բոլոր անձանց պարզելու և պատասխանատվության ենթարկելու, պատճառված վնասը հստակեցնելու ու վերականգնելու ուղությամբ։

ԵՊԲՀ աշխատակազմի ղեկավար Շուշան Դանիելյանն, անդրադառնալով ԱԱԾ բացահայտմանն, իր ֆեյսբուքյան էջում գրել է, որ նշված 149,270 ՀՀ դրամի մասով էլ պատրաստվում են վիճարկել․

«Գրեթե մոտենում ենք կատարելությանը։ 149.270 ՀՀ դրամի ենթադրյալ «չարաշահման» դեպք՝ տարեկան 13 միլիարդ շրջանառություն ունեցող հաստատությունում։

Հարգելի գործընկերներ, ԱԱԾ տարածած հայտարարությունում առկա է բացթողում, միգուցե, ոչ միտումնավոր: Նշեմ, որ «չարաշահման» ենթադրյալ գումարի չափը կազմում է ուղիղ 149 270 դրամ ՀՀ դրամ:

Որպես հիշեցում, ասենք, որ տարեկան 13 միլիարդ դրամ շրջանառություն ունեցող հաստատությունում 149.270 ՀՀ դրամի բացթողումը, իհարկե, ընդունելի չէ, այնուամենայնիվ, փաստենք, որ նման ցուցանիշը մոտ է կատարելությանը:
Ուսումնասիրելով ԱԱԾ, երբևէ, եղած այլ հայտարարությունները՝ նկատեցինք, որ եզակի դեպք էր, երբ ենթադրյալ չարաշահված գումարը նշված չէր հայտարարության մեջ: 

Հ․Գ․ Ի դեպ, դեռ այս 149,270 ՀՀ դրամի մասով էլ պատրաստվում ենք վիճարկել»,- գրել է Շուշան Դանիելյանը։