«Քամյուից մինչև բառարան». Ինչ են կարդում ԱԺ պատգամավորները

Գրքի, ընթերցանության նկատմամբ հետաքրքրությունն ու սերը մեծացնելու նպատակով ամենայն հայոց բանաստեղծ Հովհաննես Թումանյանի ծննդյան օրը՝  փետրվարի 19-ը, Հայաստանում նշվում է որպես Գիրք նվիրելու օր։ 

Գիրք նվիրելու օրվա շրջանակում Կառավարության անդամները գրքեր նվիրեցին քաղաքացիներին՝ ի դեմս ՀՀ վարչապետ Նիկոլ Փաշինյանի, իսկ Ազգային ժողովի անդամներն օրը նշեցին ֆեյսբուքյան ֆլեշմոբով:

ԱԺ փոխխոսնակ Վահե Էնֆիաջյանը սկիզբ դրեց նոր ֆլեշմոբի՝ մարտահրավերներ նետելով իր գործընկերներին:

Ֆլեշմոբի կանոնները պարզ էին. պետք է յուրաքանչյուրը Ֆեյսբուքի իր էջում նշեր իր վերջին կարդացած գրքի անունն ու մարտահրավեր նետեր իր ընկերներից մի քանիսին:

Եվ այսպես, Վահե Էնֆիաջյանը որպես իր վերջին կարդացած գիրք նշեց «Правила Жизни от Альберта Эйнштейна»-ն և մարտահրավերներ նետեց իր ԱԺ գործընկերներին՝ Իվետա Տոնոյանին, Նաիրա Զոհրաբյանին, Ալեն Սիմոնյանին, Լենա Նազարյանին, Լիլիթ Մակունցին, Գևորգ Գորգիսյանին, Անի Սամսոնյանին, Մանե Թանդիլյանին և այլոց:

Մարտահրավերին պատասխանեց ԱԺ փոխխոսնակ Ալեն Սիմոնյանը, ով նշեց՝ իր վերջին կարդացած գիրքը Ալբեր Կամյուի «Անկումն» է:

«Վերջին կարդացածս գիրքը Ալբեր Կամյուի «Անկումը» է: Ինքս մարտահրավեր եմ ուղարկում Հրաչյա Հակոբյանին և Էդուարդ Աղաջանյանին: Տղերք, դե ձեզ տեսնեմ»,- գրել էր Սիմոնյանը։

Ազգային ժողովի պատգամավոր Հրաչյա Հակոբյանը, պատասխանելով Ալեն Սիմոնյանի մարտահրավերին, հայտնեց, որ հիմա կարդում է Ռոբին Շարմայի «Վանականը որը վաճառեց իր Ֆերարին»:

Իսկ ահա, ԱԺ մյուս փոխխոսնակ Լենա Նազարյանի վերջին կարդացած գիրքը փոքր-ինչ «տարօրինակ» էր՝ հայոց լեզվի հոմանիշների բառարան:

«Երկու օր առաջ գնել եմ հայոց լեզվի հոմանիշների բառարան, հեղինակ Աշոտ Սուքիասյան։ Հա, սիրում եմ հայերեն բառերի հոմանիշներ կարդալ։ Ոչ մեկին չեմ նվիրելու»,- գրել էր Նազարյանը:

Ստորև ներկայացնում են մարտահրավերին միացած մյուս պատգամավորների գրքային նախընտրությունները: