Մարության, ինչով ես դու զբաղված, շները մարդ են ուտում. Նաիրա Զոհրաբյան

«Ես ու իմ ընդունած օրենքը ագրեսիվ կենդանիների համար պատասխանատու չենք, ես օրական հազար հատ նամակ եմ ստանում, ինչու, պարոն Մարության, ինչով ես դու զբաղված, ինչով են զբաղված քո ենթակայության տակ գտնվող կառույցները, որ մարդիկ մեզ են մեղադրում, որ շները մարդ են ուտում», ԼՈՒՐԵՐ.com-ի թղթակցի հետ զրույցում ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը վերջին շրջանում թափառող շների հարձակման դեպքերի համար մեղադրեց Երևանի քաղաքապետին:

«Քաղաքապետն ու քաղաքապետարանը տեղյակ չեն իրենց ենթակայության տակ աշխատող կառույցից, որը մատնված է կատարյալ անգործության: Քաղաքապետարանը, որը իր ենթակայության տակ ունի թափառող կենդանիների խնդրով զբաղվող ՀՈԱԿ, (ԹԱՓԱՌՈՂ ԿԵՆԴԱՆԻՆԵՐԻ ՎՆԱՍԱԶԵՐԾՄԱՆ ԿԵՆՏՐՈՆ համայնքային ոչ առևտրային կազմակերպություն (ՀՈԱԿ)), որի տնօրենը ստանում է ամսական 850.000 դրամ աշխատավարձ, ոչնչով է զբաղված»:

Պատգամավորը տեղեկացրեց, որ ԲՀԿ ավագանու անդամները 2 օր առաջ այց են կատարել այդ ՀՈԱԿ, սակայն այնտեղ թափառող ոչ մի կենդանի չի եղել:

«Այդ ՀՈԱԿ-ում, որը պետք է որսա թափառող կենդանիներին, իրենցից վտանգ ներկայացնող ագրեսիվ շներին բերի և հումանիստական ճանապարհով քնեցնի, նմուշի համար մեկ շուն անգամ չի գտնվել: ՀՈԱԿ-ի տնօրենը մեր ավագանիներին տվել է աբսուրդային պատասխան, ասել է՝ գիտեք շները հոտով ճանաչում են մեր աշխատակիցներին, և, երբ մենք մոտենում ենք՝ որս անենք, հեռավորությունից փախչում են»:

Զոհրաբյանի խոսքով՝ սա հրատապ հարց է, և պետք է շտապ լուծում ստանա քաղաքապետարանի կողմից:

Հիշեցնենք, որ Երևանի ավագանին մեկ տարի առաջ ստեղծել է «Թափառող կենդանիների վնասազերծման կենտրոն» համայնքային ոչ առեւտրային կազմակերպությունը (ՀՈԱԿ), որով պետք է լուծում տրվեր թափառող կենդանիների խնդրին: Կենտրոնը ֆինանսավորվում է համայնքային բյուջեից: