Նախագահ Հասան Ռոհանին քվեարկեց Իրանի խորհրդարանական ընտրություններում

Իրանի նախագահ Հասան Ռոհանին քվեարկել է երկրում ընթացող խորհրդարանական ընտրություններում, ոստիկանությունը հայտնում է ընտրական տեղամասերից շատերում գոյացած հերթերի մասին, տեղեկացնում է ՌԻԱ Նովոստիին:

«Մեր ստացած հաշվետվությունների համաձայն, երկրի ընտրական տեղամասերից շատերում երկար հերթեր են առաջացել»,-Թեհրանի ոստիկանապետ Հոսեյն Ռահիմիի խոսքը մեջբերել է IRIB պետական հեռուստառադիոընկերությունը:

Ավելի վաղ ընտրություններում քվեարկել է Իրանի գերագույն ղեկավար Ալի Խամենեին, նշելով, որ ցանկացած իրանցի, ում համար կարեւոր են երկրի ազգային շահերը, կմասնակցի ընտրական գործընթացին:

Իրանում փետրվարի 21-ի առավոտյան տեղական ժամանակով 08:00-ին ընտրական տեղամասերի բացումով սկսվել են խորհրդարանական ընտրությունները: Ընտրություններն ընթանում են Իրանի համար բարդ իրավիճակում, երբ սաստկանում է ԱՄՆ-ի գործադրվող տնտեսական ճնշումը, եւ, փորձագետների կարծիքով, կորոշեն, թե ովքեր են ղեկավարելու խորհրդարանը՝ ռեֆոմիստնե՞րը, որոնք համարվում են Իրանի նախագահ Հասան Ռոհանիի կողմնակիցները եւ ներկայում մեծամասնություն են կազմում խորհրդարանում, թե պահպանողականները եւ կառավարության քաղաքականության հակառակորդները:

290 պատգամավորական տեղերի համար պայքարում է ավելի քան 7 հազար մարդ, որոնց թեկնածություններն ավելի վաղ հաստատվել են Սահմանադրության պահպանության խորհրդի կողմից, որն ստուգում է հավակնորդների համապատասխանությունը նորմերին: