Թափառող կենդանիների վնասազերծման կենտրոնի վանդակները դատարկ են, թեժ գծի զանգերին էլ չեն պատասխանում (տեսանյութ)

«Վանդակները դատարկ էին, միայն մեկ շուն կար տարածքում, սարսափելի պայմանների ենք ականատես եղել»,- ԲՀԿ խմբակցության ավագանու անդամները չնախատեսված այցելել են «Թափառող Կենդանիների Վնասազերծման Կենտրոն» ՀՈԱԿ, այս մասին ԼՈՒՐԵՐ.com-ի հետ զրույցում ասաց ավագանու անդամ Հռիփսիմե Առաքելյանը:

«Գնացինք մեր աչքով տեսնելու՝ ինչով են զբաղված կենտրոնի աշխատակիցները: Կենդանիներ չլինելու փաստը մեկնաբանեցին, թե մեր գնացած ժամից է՝ հավաքված շներն արդեն ստերջացվել են և բաց են թողնվել, նոր խմբաքանակն էլ դեռ չի բերվել: Վանդակները դատարկ էին, այն պարագայում, երբ ամբողջ քաղաքում թափառող շները մարդկանց սարսափն են դարձել»:

Առաքելյանի պնդմամբ` ՀՈԱԿ-ը տեխնիկական խնդիրներ ունի, ինչպես նաև՝ աշխատանքները չեն համակարգվում ըստ պատշաճի:

«2 հավաքող մեքենաներից մեկը չի աշխատում, փչացած, կանգնած էր բակում, ասում են՝ գործընթացը կազմակերպելու համար բավարար սարքեր չունեն: Մեղմ ասած՝ խայտառակ վիճակ էր տարածքում, սանիտարահիգենիկ տարրական պայմաններն անգամ պահված չէին: Սա բացատրում էին այն հանգամանքով, թե շուտով տեղափոխվելու են այլ տարածք: Ես այս վիճակը չեմ հասկանում, մեկ տարի առաջ է ստեղծվել ՀՈԱԿ-ը, մեծ ֆինանսներ են հատկացվել բյուջեից»: 

Ավագանու անդամներին ուշացմամբ, բայց դիմավորել է տնօրենի ժամանակավոր պաշտոնակատար Հրաչ Աղաբեկյանը, ով նշանակվել է անցած երկուշաբթի: Նախկին տնօրեն Արմեն Բեգոյանը մոտ մեկ ամիս առաջ տեղափոխվել և  նշանակվել է «Կանաչապատում և շրջակա միջավայրի պահպանություն» ՀՈԱԿ-ի տնօրեն:

«Բեգոյանից հետո 1 ամսում ՀՈԱԿ-ում փոխվել է 4 ժամանակավոր պաշտոնակատար, ամեն մեկը 7-8 օր պաշտոնավարում, գնում է, անհասկանալի, անկայուն վիճակ է: Նախկին տնօրենի ժամանակ էլ լավ վիճակ չէր, բայց հիմա սարսափելի է: Հրատապ  լուծում պահանջող խնդիր է, պետք է զբաղվել այս հարցով»:

Նշենք, որ «Թափառող Կենդանիների Վնասազերծման Կենտրոն» ՀՈԱԿ-ի թեժ գծի հեռախոսահամարով բազմաթիվ զանգեր կատարեցինք, սակայն այդպես էլ պատասխան չստացանք:

Կից ներկայացնում ենք ավագանու անդամ Միքայել Մանրիկյանի՝ ՀՈԱԿ-ի տարածքում նկարած տեսանյութը: