Հիմա ես ի՞նչ նախագիծ բերեի, պահը բաց թողնված նախագի՞ծ բերեի. Բադասյանը՝ ընդդիմությանը (տեսանյութ)
ՏեսանյութերԱրդարադատության նախարար Ռուստամ Բադասյանը վստահեցնում է, որ դատական օրենսգրքի փոփոխությունների իրենց ներկայացրած փաթեթը հնարավորություն է տալիս համակարգում արդյունավետ պայքարել կոռուպցիայի դեմ: Սակայն փաթեթից դժգոհող ընդդիմադիր պատգամավորներին նախարարը հորդորում է ներկայացնել Սահմանադրությանը չհակասող իրենց տարբերակը՝ խոստանալով, որ կընդունեն առաջարկները:
Բադասյանն այս մասին ասաց ԱԺ-ում «Հայաստանի Հանրապետության դատական օրենսգիրք» սահմանադրական օրենքում փոփոխություններ եւ լրացումներ կատարելու մասին և կից ներկայացված օրենքների նախագծերի փաթեթի քննարկմանը:
Անդրադառնալով «Լուսավոր Հայաստան» խմբակցության պատգամավորի այն դիտարկմանը, թե դա կախյալ դատական համակարգ ստեղծելու փաստաթուղթ է, և անկախ դատավորները պետական մարմիններից կախվածության մեջ են լինելու, նախարարն հարցադրում արեց՝ ո՞ր մարմնից: «Էթիկայի և կարգապահական հարցերի հանձնաժողովի՞ց, որտեղ բացարձակ մեծամասնությունը դատավորներ են, ԲԴԽ-ի՞ց , որտեղ 5 դատավոր անդամ կա և 5 իրավաբան-գիտնական, ուսումնական հարցերի հանձնաժողովի՞ց, որտեղ կրկին դատավորներ են, գնահատման հանձնաժողովի՞ց, որտեղ դատավորներ են ընդգրկված: Ինչ ենք ուզում ասել. ո՞ւմից և ոնց է կախյալ լինելու»,-ասաց Բադասյանը:
Անդրադառնալով դիտարկմանը, թե նախագիծը կարող էր ավելի կոշտ լինել, պետք էր մաքրել դատական համակարգը՝ Բադասյանն ասաց՝ ո՞ւմ մաքրեն, ինչպե՞ս մաքրեն: Դիմելով պատգամավոր Տարոն Սիմոնյանին՝ նա ասաց. «Խոսում եք դատական իշխանության անկախությունից, խոսում եք դատավորների արժանապատվությունից, հետո ասում եք, որ պետք է մաքրեինք, ինչպե՞ս մաքրենք: Ամենայն պատասխանատվությամբ հայտարարում եմ մեր ընդդիմադիր գործընկերներին, նաև Արման Բաբաջանյանին՝ առաջինից երկրորդ ընթերցմամբ բերեք այն տարբերակը, որն ավելի խիստ է, լուծում է դատական համակարգի առաջ ծառացած խնդիրները, մենք անպայման կընդունենք: Բայց մի պայմանով՝ այդ տարբերակը չպետք է լինի Սահմանադրությանը հակասող: Բերեք մաքրելու լավ տարբերակ, մենք ընդունենք»,-ասաց նախարարը:
Նա առաջարկներ է սպասում նաև այն մասով, որով պատգամավորները նշեցին, որ բարեվարքության ստուգումը չի վերաբերելու գործող դատավորներին, միայն գույքային դրությունն են ստուգելու: «Սպասում ենք ձեզնից, բերեք այնպիսի տարբերակ, որտեղ կա խորհրդատվական եզրակացության ինստիտուտը, և դա կարող է հանգեցնել դատավորի պաշտոնից ազատման, և դա չի հակասում մեր Սահմանադրությանը, անպայման սա էլ կընդունենք»,-ասաց նախարարը:
ՈՒՂԻՂ ԵԹԵՐ
Ամենադիտված 
Ո՞րն է սիրված արտիստ Արտաշես Ալեքսանյանի մահվան պատճառը. հայտնի են մանրամասներ
