Ինչ էր ասել Չավուշօղլուն ԼՂ-ի հարցի վերաբերյալ և ինչու են համանախագահողները լռում (տեսանյութ)

«Օրբելի» կենտրոնի փորձագետ,ադրբեջանագետ Տարոն Հովհաննիսյանը լրագրողների հետ հանդիպմանն անդրադարձավ Թուրքիայի արտաքին գործերի նախարար Չավուշօղլուի և ԵԱՀԿ ՄԽ համանախագահների հանդիպմանը, որի ժամանակ անդրադարձ է եղել ԼՂ հարցին։

Այս մասին տեղեկատվություն էր տարածել անձամբ Թուրքիայի արտաքին գործերի նախարարը։ Ադրբեջանագետը նշեց, որ հայկական կողմը պետք է հետևի իրադարձություններին և համարժեք քայլեր իրականացնի։

«Թուրքիան իր մշտական դիրքորոշումն է արտահայտել։ Նրանք միշտ էլ ադրբեջանամետ են եղել ու այստեղ ոչ մի նոր բան մեզ համար չկա»,- ասաց նա։ Հովհաննիսյանը ընդգծեց, որ Մինսկի խմբի համանախագահողների չարձագանքելը ևս բնական է, քանի որ թուրքական կողմը իր կարծիքն է հայտնել. «Եթե համանախագահողները հերքում չեն տարածում, դեռ չի նշանակում, որ նրանք համաձայն են թուրքական կողմի կարծիքի հետ։ Նկատենք, որ համանախագահողները հերքումով, գրեթե, հանդես չեն գալիս»։

Հովհաննիսյանն անդրադաձավ սահմանային դեպքերին. «Միամտություն է մտածել, որ նման հարևան ունենալով՝ կարող է այլ կերպ լինել։ Պատմությունը ցույց է տալիս, որ միակ ձևը՝ պայքարելն է։ Նրանց սահմանային քաղաքականությունը չի փոխվել ու դժվար թե տեսանելի ապագայում այդպես լինի»։