Շրջել եմ քաղաքում եւ մոնիտորինգ եմ արել մոտավորապես 40 դեղատներում. Նաիրա Զոհրաբյան

Կենտրոնում մարդիկ սրճարաններում նստած նարգիլե են ծխում, վայելում են կյանքը, այդ մարդկանց ինչ-որ մեկը պիտի բացատրի, որ կա հստակ պահանջներ, որ յուրաքանչյուր քաղաքացի պարտավոր է պահպանել։ Այս մասին, այսօր՝ մարտի 16-ին, ԱԺ հատուկ նիստում իր ելույթի ժամանակ ասաց ԲՀԿ պատգամավոր Նաիրա Զոհրաբյանը։

«Շրջել եմ քաղաքում եւ  մոնիտորինգ եմ արել մոտավորապես 40 դեղատներում։ Գերակշիռ մեծամասնությունում դիմակներ չկային, ախտահանիչ հեղուկներ երեկ եւ այսօր կային։ Պետք է հստակ հսկողություն սահմանվի, որ հաճախորդին 2 ալկոգելից ավելի չտրվի եւ դիմակներն էլ հստակ չափաքանակով գնեն։ Դեղատներում ասում են՝ մենք 5 հատից ավելի չենք տալիս, բայց ես ուղարկել եմ քաղաքացի, ասել է՝ ես ավելին կվճարեմ, 30 հատ դիմակ է գնել։ Հասկացանք, որ աչքի ուլունք կախելը տներում եւ փողոցներում խունկ ծխելը կորոնավիրուսի դեմ պայքարի լավագույն տարբերակը չէ»,- ասաց պատգամավորը։

Զոհրաբյանը նկատեց, որ քաղաքացիների մոտ արհեստական խուճապ է ստեղծվել, չգիտեն՝ դիմակ ե՞րբ կարելի կրել, նրանց պետք բացատրել.

«Կյանքը կորոնավիրուսի ժամանակ եւ կյանքը կորոնավիրուսից հետո, իսկ որ կորոնավիրուսից հետո կյանքը շարունակվելու է, գոնե ես դրանում չեմ կասկածում։  Պարոն վարչապետ, դուք էլ եք ճիշտ, տիկին Սամսոնյան դուք էլ եք ճիշտ, որովհետեւ ես այսօր եղել եմ 2 խանութներում՝ Կոմիտասի «Երեւան սիթի»-ում, որտեղ գաստրոնոմիական արմագեդոն էր, եւ եղել եմ Ալավերդյանի «Զովքում», որտեղ արագեդոն չէր։ Կարծում եմ, որ այդ պանիկան առաջացավ նաեւ այն պատճառով, որ արտակարգ ռեժիմ ձեւակերպումը մարդկանց մոտ առաջցրեց խուճապ, որ կլինի պարետային ժամ։ Կարեւոր անելիք ունի պարետը եւ ստեղծված հանձնախումբը, որպեսզի նաեւ սոցիալական գովազդներով մարդկանց բացատրվի տարրական քայլերը։ Որեւէ մեկը պարտավոր չէ իմանալ, քայլում ես քաղաքով եւ բոլորը դիմակներով ման են գալիս, հասկանում ես, որ դա բացարձակապես անիմաստ է, բայց մարդկանց իննչ-որ մեկը պետք է բացատրի՝ ինչ պետք է անել»։

Անդրադառնալով երկրում սպասվող ապրանքների գների աճին կամ նվազմանը, Զոհրաբյանը շեշտեց. «Համաձայն չեմ, որ մենք պետք է գնաճը կանտրոլ անենք եւ մենք իրազեկենք։ Բա տնտեսական մրցակցության հանձնաժողովն ինչի՞ համար է, երբ օրինակ 400 դրամանոց սովորական սպիրտը 3400 դրամ է վաճառվում։ Այդ սովորական սպիրտը մի քանի օր առաջ 3400 դրամ չէր։ Սրան ադեկվատ բացատրություն չկա»։

Նաիրա Զոհրաբյանը հայտնեց, որ իրենց քաղաքացիներ են դիմում, նշելով, որ մասնավոր ընկերություններում են աշխատում, իսկ մասնավորի սեփականատերը փակում է ընկերությունը. «Ես ու իմ ընտանիքի 4 անդամն աշխատում ենք ռեստորանում, մեզ ասել են՝ վաղվանից այլեւս չգաք աշխատանքի, ապրում ենք վարձով բնակարանում ունենք վարկեր, ասեք՝ ինչպե՞ս փակե վարկերը։ Քիչ առաջ Վերնիսաժի ամբողջ կոլեկտիվն ինձ նամակ է հղել՝ առեւտուր չկա, ունեմ վարկեր։ Ասում եք, որ վարկային համաներում կամ վարկային արձակուրդ համատարած չի կարող լինել, եւ անձինք, ովքեր վարկեր ունեն, գնան եւ բանկերի հետ պայամանավորվել։ Բանկերի համար շատ հեշտ է խոշոր տնտեսվարողին հրավիրել իր սենյակ… բայց ինչ անեն այն մարդիկ, որոնք ոչ իրենց կամքով հայտնվել են ոչ շահեկան վիճակում։ Ո՞վ է իրենց շահերը պաշտպանելու։  Պետությունը պարտավոր է բանկերի հետ այս խնդիրը քննարկել ու կարգավորել։ Մենք կոտրելու ենք միջին փոքր բիզնեսի ողնաշարը, եթե Կառավարությունը բանկերի հետ չքննարկի նրանց աջակցություն տալու ծրագիրը»։