Լիմոնադի գործարանում իրավաբան աշխատած անձը 15 տարի հետո կարո՞ղ է աշխատել դատավոր․ Բաղդասարյանը՝ Դավթյանին

Ես չգիտեմ դուք մագիստրատուրա ավարտել եք, թե ոչ։ Այս մասին այսօր՝ մարտի 20–ին, ԱԺ պետական-իրավական հարցերի մշտական հանձնաժողովի նիստին Հայաստանի Հանրապետության դատական օրենսգրքում փոփոխություններ կատարելու մասին որոշման նախագծի քննարկման ժամանկ ասաց նախագծի հեղինակ ԱԺ «Իմ քայլը» խմբակցության պատգամավոր Արթուր Դավթյանը՝ պատասխանելով ԱԺ «Իմ քայլը» խմբակցության պատգամավոր Նիկոլայ Բաղդասարյանի հարցին, թե արդյոք զարգացած երկրների փորձի ուսումնասիրություններ կատարվե՞լ են, թե ինչ չափանիշներ են անհրաժեշտ դատավոր դառնալու համար։

«Չունեք չէ՞ մագիստրատուրայի դիպլոմ, բայց ես համոզված եմ, որ դուք 15 տարվա ստաժ ունենալով՝ այսօր կամ վաղը, երբ ավարտվի ձեր պատգամավորական գործունեությունը դուք  շատ լավ դատավոր կարող եք աշխատել, դրա համար սա ձեզ համար լավ հնարավորություն է», – ասաց Դավթյանը։

Բաղդասարյանը կրկին կրկնեց հարցը, թե արդյոք ուսումնասիրություններ արվել են այլ երկրներում, ինչին Դավթյանը ծիծաղելով պատասխանեց. «Ի՞նչ կապ ունի դա այս նախագծի հետ։ Օրինակ Ճապոնիայում կա, Չինաստանում չկա, հիմա չեմ հիշում, ի՞նչ է փոխելու դա»։

Ի պատասխան Դավթյանի Բաղդասարյանը նշեց, որ նա անլրջության է վերածում հարցը, որից հետո Դավթյանն ասաց․ «Դե լավ, դուք լրջացրեք հարցը, տեսնեմ»։

Բաղդասարյանի այն հարցին, արդյոք կարո՞ղ է օրինակ լիմոնադի գործարանում, որպես իրավաբան աշխատած անձը 15 տարի հետո աշխատել դատավոր, Դավթյանը պատասխանեց. «Եթե անձը լիմոնադի գործարանի իրավաբան է աշխատել 15 տարի եւ ունի իրավաբանի բարձրագույն կրթություն, կարող է դառնալ ՍԴ անդամ։ Ես մտածում եմ, եթե մեր օրենսդրությունը թույլ է տալիս այդ պայմաններում անձը դառնա ՍԴ անդամ, ուրեմն Առաջին ատյանի դատարանի անդամ դառնալու համար այդ պայմանները պետք է գոնե լինի, որովհետեւ ես կարծում եմ ՍԴ անդամ լինելու համար պետք է ավելի բարձր պահանջներ լինեն, քան Առաջին ատյանի դատավորի համար դրված պահանջները»։