Հայտնվել ենք անորոշ վիճակի մեջ. Ռոբերտ Քոչարյանի փաստաբան

Հայտնվել ենք անորոշ վիճակի մեջ, չգիտենք մեկ շաբաթից, մեկ ամսից, թե՞ մի քանի ամսից մեր միջնորդությունը կարող է քննվել: Այս մասին այսօր լրագրողների հետ հանդիպմանն ասաց ՀՀ 2-րդ նախագահ Ռոբերտ Քոչարյանի փաստաբանական թիմի անդամ Հայկ Ալումյանը՝ նշելով, որ իրենք միջնորդություն էին ներկայացրել, որով խնդրել էին  խափանման միջոցը փոխել և ընտրել անձնական երաշխավորություն խափանման միջոց՝ հաշվի առնելով, որ ՀՀ նախկին 3 վարչապետները և Արցախի վարչապետը գրավոր երաշխավորություն են ներկայացրել: 

«Մարտի 17-ին նշանակված դատական նիստը տեղի չունեցավ, որի ժամանակ պետք է քննարկվեր մեր միջնորդության հարցը՝ պատճառաբանությամբ, որ դատավոր Աննա Դանիբեկյանը վատառողջ է: Չնայած մեր պնդումներին՝ այդպես էլ չասացին, թե առողջական ինչ խնդիր է, որպեսզի հասկանայինք, թե ինչ կանխատեսումներ կային մյուս նիստերի դեպքում: Պարզելուց հետո, որ դատավորը վիրահատվել է, մենք անմիջապես դիմեցինք Երևանի առաջին ատյանի ընդհանուր իրավասության դատարանի նախագահին, որպեսզի մեր միջնորդության քննությունը փոխանցի այլ դատավորի, որովհետև խափանման միջոցի հետ կապված հարցի լուծումը պետք է անհապաղ լուծել, քանի որ անձը գտնվում է կալանքի տակ»,- ասաց նա:

Փաստաբանի խոսքով՝ դատավորը գրավոր մերժել է իրենց պահանջ-խնդրանքը և խափանման միջոցի միջնորդության քննությունը չի փոխանցել այլ դատավորի, ուստի այսօր բողոք են ներկայացնելու Վերաքննիչ դատարան: