Դատարանը վարույթ է ընդունել Քոչարյանի պաշտպանի դատական հայցն՝ ընդդեմ Հ1-ի և ԱԱԾ֊ի

Երևանի ընդհանուր իրավասության դատարանը վարույթ է ընդունել ՀՀ 2-րդ նախագահ Ռոբերտ Քոչարյանի պաշտպան Արամ Օրբելյանի հայցադիմումն՝ ընդդեմ ԱԱԾ-ի և Հանրային հեռուստաընկերության: Այս մասին ԼՈՒՐԵՐcom-ին տեղեկացրեց Արամ Օրբելյանը՝ նշելով, որ հայցադիմումը կքննի դատավոր Նաիրա Ավետիսյանը։ 

Արամ Օրբելյանը դիմել է դատարան՝ պահանջելով հերքել զրպարտություն հանդիսացող փաստացի տվյալները, ինչպես նաև փոխհատուցել զրպարտության հետևանքով պատճառված վնասը: 

Օրբելյանի փաստաբան Նարինե Բեգլարյանը ԼՈՒՐԵՐ.com-ի հետ զրույցում նշեց, որ սա դատավարական գործընթացների հերթական փուլն է. «Կատարվել են զրպարտչական արտահայտություններ, որոնք չեն համապատասխանում իրականությանը և դրանք այն արտահայտություններն են, որտեղ ասվել է, որ պարոն Օրբելյանը 2018 թվականի մայիսից օգոստոսը պարբերաբար կարգի խախտմամբ ելումուտ է ունեցել Սահմանադրական դատարանի շենք»:

Սակայն ներկայացուցիչը հայտնեց, որ նշված ժամանակահատվածում Օրբելյանը ՍԴ շենք պարբերաբար ելումուտ չի ունեցել։

Նշենք, որ դատական հայցը ներկայացվել է հունվարի 30-ին Հ1-ի լուրերի գլխավոր թողարկման ընթացքում Հայաստանի Հանրային հեռուստատեսությամբ ցուցադրված «Քոչարյանի պաշտպանի ՍԴ մտնելու հետևանքները» վերտառությամբ ռեպորտաժի համար։ 

Հայցը դատարան է մուտքագրվել մարտի 3-ին և մակագրվել Երևան քաղաքի ընդհանուր իրավասության դատարանի դատավոր Նաիրա Ավետիսյանին: Սակայն դատարանը մարտի 17-ին հետ է վերադարձրել Օրբելյանի ներկայացրած առաջին հայցադիմումը՝ պատճառաբանելով, որ հայցադիմումը թերի է և բացակայել է Օրբելյանի ներկայացուցչի հասցեն: 

Մարտի 18-ին Օրբելյանը ներկայացրել է երկրորդ հայցադիմումն ընդդեմ ԱԱԾ-ի և Հանրային հեռուստաընկերության, որը դատարանը վարույթ է ընդունել: