Դատարանը օպերատիվ է գործում ձերբակալության դեպքում, բայց չի շտապում հակառակ պարագայում. փաստաբան

Դատարանը տարօրինակ կերպով օպերատիվ է գործում, երբ խոսքը ձերբակալության մասին է, բայց չի շտապում, երբ խոսքը խափանման միջոցի վերանայման մասին է: Այս մասին այսօր՝ ապրիլի 8-ին, մամուլի ասուլիսին ասաց ՀՀ 2-րդ նախագահ Ռոբերտ Քոչարյանի պաշտպան Արամ Վարդևանյանը՝ նշելով, որ Քոչարյանը պետք է անհապաղ ազատ արձակվի կալանքից և կան մի շարք հանգամանքներ, որոնք պետք է հաշվի առնվի: Նա նշեց, որ իրենք դիմել են Գերագույն դատական խորհրդի ղեկավարին և 2 անգամ` օմբուդսմենին. «Օմբուդսմենը համակարծիք է, որ ստեղծված իրավիճակը խնդրահարույց է մարդու իրավունքների պաշտպանության տեսանկյունից և դատավորի բացակայությունը մարդու իրավունքների խախտում է: Օրինակ եվրոպական կողմը` ի դեմս Խոշտանգումների կանխարգելման հանձնաժողովի և հանձնակատար Դունյա Միյատովիչի, կոչ է արել այլընտրանքային միջոցներ ձեռնարկել կորոնավիրուսի պանդեմիայի հետ կապված ռիսկային խմբում գտնվող անձանց նկատմամբ: Կան դատավորներ, որոնք իրենց սեփական նախաձեռնությամբ հենց այդպես էլ արել են: Ընդ որում, «Վարդաշեն» քրեակատարողական հիմնարկի աշխատակիցների մեջ կան վարակվածներ, չնայած իշխանությունները չէին ցանկանում դա խոստովանել»,- ասաց փաստաբանը: 

Անդրադառնալով Քոչարյանի գործով դատավոր Աննա Դանիբեկյանի գրասենյակի հետ կապ հաստատելու փորձերի մասին, Վարդեւանյանն ասաց, որ նրանց էլ հայտնի չէ, թե դատավորը, երբ կվերադառնա. «Եթե դատավորն այդպես է վերաբերվում գործին, երբ ձերբակալված կա, ապա նա պատասխանատվություն է կրում դրա հետ կապված բոլոր հնարավոր ռիսկերի համար, դա դատավորին պատիվ չի բերում»,- եզրափակեց նշեց նա:

Նշենք, որ մարտի 17-ին նշանակված դատական նիստին պետք է քննարկվեր Ռոբերտ Քոչարյանին անձնական երաշխավորությամբ ազատ արձակելու մասին միջնորդությունը, սակայն նիստը հետաձգվել էր գործով նախագահող դատավոր Աննա Դանիբեկյանի վատառողջ լինելու պատճառով: Ավելի ուշ հայտնի էր դարձել, որ վերջինս վիրահատվել է և հայտնի չէ, թե երբ կվերադառնա: