«Գույքի գնահատման և աճուրդի կենտրոն»ՊՈԱԿ-ի գլխավոր տնօրենին ծեծի ենթարկողն ազատ է արձակվել

Երեւան քաղաքի ընդհանուր իրավասության դատարանից, այսօր՝ ապրիլի 11-ին, ազատ է արձակվել Երեւան քաղաքի բնակիչ, 24-ամյա Արամ Պետրոսյանը:

Shamshyan.com-ի հաղորդմամբ, վերջինիս նկատմամբ ոստիկանության Մաշտոցի բաժնում հարուցվել է քրեական գործ՝ ՀՀ քր-օր-ի 258 հոդվածի հատկանիշներով եւ նա, ով կասկածվում է ապրիլի 2-ին Մարգարյան փողոցում՝ «Կայզեր» սուպերմարկետի մոտ ՀՀ պետական գույքի կառավաեւման կոմիտեի «Գույքի գնահատման եւ աճուրդի կենտրոն» պետական ոչ առեւտրային կազմակերպության գլխավոր տնօրեն 30-ամյա Արման Աբրահամյանին ծեծի ենթարկելու մեջ, հայտնաբերվել էր Երեւան քաղաքի ոստիկանության վարչության քրեական հետախուզության բաժնի եւ ոստիկանության Մաշտոցի բաժնի քրեական հետախուզության բաժանմունքի ծառայողների կողմից:

Դատարանը նրա ձերբակալությունն այսօր համարել էր ոչ իրավաչափ ու ազատ արձակել:

Ավելի վաղ հայտնել էինք, որ ապրիլի 4-ին ոստիկանությունում օպերատիվ տեղեկություններ էին ստացվել, որ ապրիլի 2-ին, ժամը 22:00-ի սահմաններում Մարգարյան փողոցում՝ «Կայզեր» սուպերմարկետի մոտ, Mercedes մակնիշի ավտոմեքենայի վարորդը ձայնային ազդանշաններ տալով՝ հարկադրաբար կանգնեցրել է Nissan մակնիշի 375 ՏՏ 60 համարանիշի ավտոմեքենայի վարորդին, որից հետո Mercedes-ի վարորդն իր ընկերների հետ անհիմն վիճաբանել են Nissan-ի վարորդի հետ, կոպիտ կերպով խախտելով հասարակական կարգը ու բացահայտ անհարգալից վերաբերմունք դրսեւորել հասարակության նկատմամբ, այնուհետեւ դիտավորությամբ վնասել են Nissan-ի կողային հայելին եւ պատճառել վարորդին վնասվածքներ, որից հետո Mercedes-ով հեռացել են:

Nissan-ի վարորդը Երեւանի բնակիչ, 30-ամյա Արման Աբրահամյանն էր, ով աշխատում է ՀՀ պետական գույքի կառավարման կոմիտեի «Գույքի գնահատման եւ աճուրդի կենտրոն» պետական ոչ առեւտրային կազմակերպության գլխավոր տնօրեն: