Մաքրման գործընթացն անընդհատ ընթանում է. Ալեն Սիմոնյան

ՀՀ ԱԺ փոխնախագահ Ալեն Սիմոնյանի կարծիքով` պետական համակարգը նախկին իշխանության ժամանակ աշխատած և հեղափոխության շանսը չարաշահած մարդկանցից մաքրելու գործընթացն անընդհատ շարունակվում է։ Այս մասին Սիմոնյանն ասաց ապրիլի 21-ին լրագրողների հետ զրույցում, անդրադառնալով ՀՀ վարչապետ Նիկոլ Փաշինյանի հայտարարությանը։

«Մաքրման գործընթացն անընդհատ ընթանում է։ Հարուցվող քրեական գործերը, հետախուզման մեջ գտնվող անձինք դրա վառ ապացույցն են։ Կարծում եմ, որ մոտ ապագայում էլ ավելի շատ նման օրինակների ականատես կլինենք»,- ասաց Սիմոնյանը։

Հարցին՝ արդյոք նիստում քննարկվել է վարչապետի այն հայտարարությանը, որ ինքը պատրաստվում է պետական համակարգը մաքրել «Սերժի մնացորդներից», Ալեն Սիմոնյանը պատասխանեց.

«Դրա մասին խոսում է ոչ միայն վարչապետը, այլ նաեւ մեր համաքաղաքացիները։ 2 տարի բավարար ժամկետ է, թեեւ ամեն ինչ արվել է, շատ ու շատ խնդիրներ լուծվել են, որոնց մասին չի խոսվում հասկանալի պատճառներով։ Մեդիադաշտն այսօր զբաղված է մեկ այլ գործողությամբ, զբաղված է գումար աշխատելու եւ հետաքրքիր վերնագիր հնարելու հարցով։ Չեմ կարծում, որ վարչապետը նոր բան է ասել, այդ ամենը բոլորս էլ լավ գիտենք։ Այդ մաքրման պրոցեսն անընդհատ ընթանում է։ Այն քրեական գործերը, հետաքննության մեջ գտնվող անձինք, դրա վառ ապացույցն են, մենք մոտ ապագայում էլ ավելի շատ նման օրինակների ականատես կլինենք»։