Դատավոր Գրիգորյանի իրավունքների խախտում է արձանագրվել. քննիչի նկատմամբ քրգործ կհարուցվի

Երևանի ընդհանուր իրավասության դատարանը`  մայիսի 4-ին, բավարարել է դատավոր Դավիթ Գրիգորյանի աշխատասենյակը խուզարկելիս ՀՔԾ քննիչի կողմից թույլ տրված չարաշահումների դեպքի առթիվ քրեական գործի հարուցումը մերժելու որոշման դեմ պաշտպանի բողոքը։ Այս մասին ԼՈՒՐԵՐ.com-ին հայտնեց Դավիթ Գրիգորյանի փաստաբան Գեորգի Մելիքյանը։ 

«Մենք հանցագործության մասին հաղորդում էինք ներկայացրել՝ պաշտոնական դիրքը չարաշահելու վերաբերյալ, ԱԱԾ-ում նյութեր նախապատրաստվել էին, բայց  քրեական գործի հարուցումը մերժել էին: Ավելի ուշ՝  բողոքարկեցինք և բողոքը բավարարվեց: Դա ենթադրում է, որ ՀՔԾ քննիչի նկատմամբ հարուցվելու է քրեական գործ և իրականացվելու է  նախաքննութուն»,-նշեց փաստաբանը:

Հիշեցնենք, որ Դավիթ Գրիգորյանին մեղադրանք է առաջադրվել ՀՀ քրեական օրենսգրքի 314 հոդվածի 1-ին մասի հատկանիշներով, այն է՝ պաշտոնեական կեղծիք կատարելը։ ԲԴԽ որոշմամբ՝ նրա լիազորությունները կասեցվել էին։

Նշենք, որ Դավիթ Գրիգորյանը ՀՀ երկրորդ նախագահ Ռոբերտ Քոչարյանի գործով դատավորն էր և որոշում էր կայացրել ազատ արձակել Քոչարյանին՝ հիմք ընդունելով Արցախի ներկա և նախկին նախագահների անձնական երաշխավորությունը։