Գավառի աղմկահարույց դեպքերից հետո Գեղարքունիքում նոր ոստիկանապետ նշանակվեց

ՀՀ ոստիկանության Գեղարքունիքի մարզային վարչության պետ է նշանակվել Արթուր Մկրտչյանը: Այս մասին ԼՈՒՐԵՐ.com-ին փոխանցեցին ոստիկանության լրատվական բաժնից: ՀՀ ոստիկանապետ Արման Սարգսյանի հրամանով՝ Աշտարակի բաժնի պետ Արթուր Մկրտչյանն ազատվել է զբաղեցրած պաշտոնից և նշանակվել Գեղարքունիքի ոստիկանապետ: Մինչ այդ Գեղարքունիքի ոստիկանապետի պաշտոնը զբաղեցնում էր Գևորգ Հակոբյանը, ով օրեր առաջ՝ մայիսի 4-ին, ազատվեց զբաղեցրած պաշտոնից ՀՀ ոստիկանության պետ Արման Սարգսյանի հրամանով: Նա այդ պաշտոնին էր 2019թ. նոյեմբերից: Նկատենք՝ թեև մեզ հետ զրույցում ոստիկանությունից հայտնել էին, թե Հակոբյանի պաշտոնից ազատումը կապված է կադրային փոփոխություններով, սակայն ակնհայտ է, որ այն պայմանավորված է գավառցիների ու նորատուսցիների միջև տեղի ունեցած վենդետայի հետ: Հիշեցնենք, որ ապրիլի 28-ին Գավառում կրակոցներ էին հնչել, ինչի հետևանքով 2 մարդ մահացել էր, իսկ 4–ը տեղափոխվել էին հիվանդանոց։ Այնուհետև տեղեկություններ տարածվեցին, որ որոշ մարդիկ գիշերը մտել են Գավառի հիվանդանոց ու վիրավորներից երկուսի վիզը կտրել։ Դեպքերի հետ կապված՝ ոստիկանությունում ծառայողական քննություն էր նշանակվել։