Խաչատուր Քոքոբելյանի որդու և եղբոր նկատմամբ բռնություն գործադրելու փաստով հարուցվել է քրգործ

ՀՀ Քննչական կոմիտեից հայտնում են՝ 2020թ. մայիսի 8-ին՝ ժամը 19:30-ի սահմաններում, N զորամասի զինծառայող Ս. Ն.-ն, Տավուշի մարզի Իջևան քաղաքի բնակիչ Է.Է.-ն և քննությամբ չպարզված, զինվորական համազգեստով ևս երկու անձինք, Տավուշի մարզի Աչաջուր գյուղի վարչական տարածքում տեղակայված «Գրին Հաուս» ՍՊԸ-ի ջերմոցների պահակակետի հարակից տարածքում, հասարակության նկատմամբ բացահայտ անհարգալից վերաբերմունք դրսևորելով, դիտավորությամբ կոպտորեն խախտել են հասարակական կարգը՝ մոտ 10-15 րոպե բարձրաձայն սեռական բնույթի հայհոյանքներ են տվել, որը զուգորդվել է այնտեղ գտնվող Վ.Ք.-ի, Ս.Ք.-ի և Յու.Ք.-ի նկատմամբ բռնություն գործադրելով՝ ձեռքերով, ոտքերով, բահով հարվածներ հասցնելով և մարմնական վնասվածքներ պատճառելով, գույքը վնասելով, սպանության և գույքը ոչնչացնելու սպառնալքով, ինչպես նաև՝ զենք հանդիսացող ինքնաձիգի գործադրմամբ մենահատ կրակոց արձակելով:

«Դեպքի առթիվ ՀՀ քննչական կոմիտեի զինվորական քննչական գլխավոր վարչության վեցերորդ կայազորային քննչական բաժնում ՀՀ քրեական օրենսգրքի 258-րդ հոդվածի (խուլիգանություն) 4-րդ մասով նախատեսված հանցագործության հատկանիշներով հարուցվել է քրեական գործ և կատարվում է նախաքննություն»,- ասված է հաղորդագրության մեջ:

ArmLur.am-ի  հետ զրույցում Ազատ դեմոկրատներ կուսակցության փոխնախագահ Անժելա Խաչատրյանը նշեց, թե միջադեպին մասնակից Քոքոբելյանները վնասվածքներ են ստացել։ Նա մանրամասնեց․ «Տեղի է ունեցել զինված ավազակային հարձակում։ Անվտանգության աշխատակիցն ահազանգել  է ոստիկանություն, ապա նաև Քոքոբելյաններին։ Քոքոբելյանները հասել են այն պահին, երբ փորձել են հարձակում իրականացված անինք փորձել են պահակակետի պատուհանից դուրս քաշելով հանել անվտանգության աշխատակցին, որից հետո էլ հարձակվել են Քոքեբելյանների վրա։ Այժմ ոստիկանությունը փնտրում է հարձակումն իրականացրած անձանց, մեկին էլ արդեն գտել են», – նշեց նա։

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: