Ձերբակալվել է «Հեղափոխության պահապաններ»-ին սպառնած տղամարդը

Ձերբակալվել է քաղաքացի Նարեկ Սարգսյանը, ով սպառնալիքներ էր հնչեցրել «Հեղափոխության պահապաններ» կոչվող խմբավորման անդամ Հայկ Ստեփանյանի և մյուս անդամների հասցեին: Նարեկ Սարգսյանի հայտարարությունից հետո Ոստիկանությունը հաղորդում տարածեց, որում նշվում է. «Մայիսի 6-ին Երևան քաղաքի քննչական վարչությունում ՀՀ քրեական օրենսգրքի 258-րդ հոդվածի հատկանիշներով հարուցվել է քրեական գործ՝ «Ֆեյսբուք» սոցիալական ցանցում ուղիղ եթերով օգտատիրոջ կողմից բռնություն գործադրելու սպառնալիքներ տալով, բացառիկ ցինիզմով զուգորդված խուլիգանություն կատարելու դեպքի առթիվ։ Մայիսի 7-ին Քրեական ոստիկանության գլխավոր վարչության և Երևան քաղաքի քննչական վարչության աշխատակիցների օպերատիվ-հետախուզական և քննչական գործողությունների շնորհիվ տղամարդը հայտնաբերվեց, կասկածանքով բերման ենթարկվեց և ձերբակալվեց։ Նրան մեղադրանք է առաջադրվել։ Նախաքննությունը շարունակվում է»։

Հիշեցնենք, որ «Հեղափոխության պահապաններ» խմբավորման անդամները պարբերաբար սպառնալիքներ են հնչեցնում բոլոր նրանց հասցեներին, ովքեր այս կամ այն հարցով ընդդիմանում են գործող իշխանությանն ու վարչապետ Նիկոլ Փաշինյանին:  Խմբավորումն ամիսներ առաջ էլ խոստացել էր ահաբեկչություն իրականացնել, եթե որևէ մեկը խանգարի Նիկոլ Փաշինյանի վարչապետ լինելուն: Նրանք անդրադարձել էին նաև «Ադեկվադ» միաբանության հիմնադիր Արթուր Դանիելյանի և ՀՀ ԱԺ փոխնախագահ Ալեն Սիմոնյանի միջև եղած ընդհարմանն ու ֆեյսբուքյան ուղիղ եթերում բազմաթիվ վիրավորական արտահայտություններ հնչեցրել Արթուր Դանիելյանի հասցեին: