Մանկապարտեզ կհաճախեն աշխատող ծնողների և սոցիալապես անապահով ընտանիքների երեխաները. Վիրաբյան

Մանկապարտեզները Երևանում բացվում են մայիսի 20-ից և գործելու են հատուկ կանոնակարգերով։ Այս մասին այսօր ասաց Երևանի քաղաքապետի տեղակալ Տիգրան Վիրաբյանը։ Նա նշեց, որ առաջնահերթություն է տրվում այն երեխաներին, որոնց ծնողները գործնականում չեն կարողանում ապահովել երեխաների խնամքը տանը և աշխատանքը հեռավար ձևով իրականացելու հնարավորություն չունեն։

«Մանկապարտեզ գալու առաջնահերթություն են ունենալու նաև այն երեխաները, որոնց ծնողները աշխատում են կամ աշխատում է միայն մայրը, նաև սոցիալապես անապահով ընտանիքի երեխաները։ Նախնական հարցումներ է իրականացվել Երևանի 161 մանկապարտեզների կողմից: Թվով 31․000 ծնողներից 11․000-ը գտնվում է այս կարգավիճակներում և նրանք ցանկություն են հայտնել երեխաներին բերել մանկապարտեզ»,-նշեց Վիրաբյանը և հավելեց, որ մշակվել են անվտանգության կանոններ, որոնցով պետք է առաջնորդվել, սկսած մանկապարտեզների բակի նշագրումներից, որպեսզի ծնողնեը կարողանան առավոտյան երեխաներին բերել մանկապարտեզ և միևնույն ժամանակ պահեն սոցիալական հեռավորություն։ Վիրաբյանը նշեց նաև, որ  բացառվում է ծնողներից որևէ մեկի մուտքը մանկապարտեզ։

«Աշխատակիցները դուրս են գալիս, հեռավար ջերմաչափում են անում և համոզվելով, որ երեխան տաքություն չունի, ընդունում են մանկապարտեզ: Հորդորում եմ, որ բոլոր ծնողները այդ ժամանակահատվածում լինեն համբերատար, որովհետև մեկ մուտքով մոտ 100 երեխա մուտք են գործելու մանկապարտեզ»,- ասաց Վիրաբյանը և տեղեկացրեց, որ երեխաները ջերմաչափվելու են նաև մանկապարտեզի ժամի ավարտին, և եթե նրանցից մեկի մոտ գրանցվում է ջերմութուն ծնողներին հորդորում են հաջորդ օրը չբերել մանկապարտեզ։

Վիրաբյանը կտրուկ ասաց, որ խմբերում լինելու են 8-10 հոգի։ Հրաժարվելու են այն խաղերից և խաղալիքներից, որոնց վրա կարող է վարակը երկար մնալ: Հարցին, թե աշխատակիցներից քանիսն է ռիսկային գոտում գտվող, Վիրաբյանը պատասխանեց. «Աշխատակիցների 20-25 տոկոսն են կազմում, բնականաբար նրանք չեն ներկայանալու աշխատանքի, սակայն շարունակելու են վճարվել այնպես, ինչպես վճարվել են մինչև հիմա։ Աշխատակիցներին փոխարինելու են իրենց գործընկերները, այդ աշխատանքներն արդեն արվել են»:

Փոխքաղաքապետի տեղեկացմամբ՝ այսօր և վաղը Երևանի բոլոր մանկապարտեզներում կիրականացվեն ախտահանման միջոցառումներ, որոնք կշարունակվեն ամեն օր՝ աշխատանքային օրվա ավարտից հետո։ Անդրադառնալով սննդի մատակարարմանը, նա ասաց, որ սննդի տրամադրումը պետք է կատարվի նախկինի նման՝ որոշակի խստացումներով։ Որոշ սննդամթերքների պարագայում կփոխվի փաթեթավորման ձևը: