Շուրջ 30 տոննանոց աղացի զրահասալիկներ էին գողացել, տեղափոխել ու հողով ծածկել. կան բերման ենթարկվածներ

Օգոստոսի 26-ին ոստիկանության Կապանի բաժնում տեղեկություն է ստացվել, որ Կապան քաղաքի Գործարանային փողոցի երկաթի հավաքման բազայից գողություն է կատարվել:

Ոստիկանությունը տեղեկացնում է, որ ձեռնարկված միջոցառումների արդյունքում Կապանի ոստիկանները բաժին բերման են ենթարկել 40-ամյա մի տղամարդու, որը տվել է խոստովանական բացատրություն, որ օգոստոսի 24-ի գիշերը, եւս երեք հոգու հետ, նշված բազայից կատարել են մեծ քանակությամբ երկաթյա իրերի գողություն:

Պարզվել է, որ օգոստոսի 24-ին, ժամը 22.00-ից 24.00-ն ընկած ժամանակահատվածում, Կապանի բնակիչ, 39-ամյա տղամարդը կոտրել է բազայի դարպասի կողպեքը, վերամբարձ կռունկի 29-ամյա վարորդը՝ 54 հատ, շուրջ 30 տոննա կշռով, 5.000.000 դրամ արժողությամբ հանքանյութի աղացի զրահասալիկներ է բարձել 41-ամյա տղամարդուն պատկանող «ԿամԱԶ» բեռնատարը, իսկ բեռնմանն օգնել է նաեւ 55-ամյա մի տղամարդ։ Գողոնը տեղափոխել էին Կապանի նախկին առեւտրի բազայի մոտակայքը, դատարկել, իսկ հաջորդ օրը ամբարձիչի կիրառմամբ հողով ծածկել էին:

Գողությանը մասնակցած բոլոր անձինք հայտնաբերվել եւ բերման են ենթարկվել։

Գողոնը հայտնաբերվել է:

Տուժողից ընդունվել է հաղորդում:

Պարզվել է նաեւ, որ բազայի դարպասի կողպեքը կոտրած 39-ամյա տղամարդը, նշված գողությունը կատարելուց հետո, օգոստոսի 25-ին, ժամը 01.00-ի սահմաններում, միայնակ վերադարձել է նշված բազա եւ գողացել 250 կգ երկաթե գնդեր ու տեղափոխել իր տան բակ:

Գողոնը հայտնաբերվել է:

Կատարվում է քննություն։