Ռուս կինը համացանցում ներկայացել է որպես գայթակղիչ արտաքինով աղջիկ և խարդախությամբ գումարներ հափշտակել տղամարդկանցից
ԱյլՌԴ Իրկուտսկի շրջանի 40-ամյա բնակչուհին խարդախությամբ գումարներ է հափշտակել իր համացանցային սիրեցյալներին: Վերջին երկու տարվա ընթացքում 40-ամյա տիկնոջ զոհ են դարձել մի քանի տղամարդիկ, հայտնում է ՌԴ Ներքին գործերի նախարարության տարածքային շտաբի մամուլի ծառայությունը:
360tv.ru-ի հաղորդմամբ` գրավիչ աղջիկների կեղծ լուսանկարների օգնությամբ համացանցային գայթակղիչը նամակագրություն է սկսել Իրկուտսկի, Աստրախանի, Չիտայի և Կալուգայի շրջանների մի քանի բնակիչների հետ: Նա տղամարդկանց պատմել է, թե իբր իր ծանր հիվանդ դստեր բուժման համար անհրաժեշտ են մեծ գումարներ:
Սակայն, հենց սրտացավ տղամարդիկ գումար են փոխանցել, նրանց զրուցակիցն անհետացել է` ջնջելով իր օգտահաշիվը:
Իրավապահ մարմինների աշխատակիցներին հաջողվել է գտնել խարդախ տիկնոջը: Այժմ կինը կալանավորված է և գտնվում է տնային կալանքի տակ: Նա կասկածվում է սոցիալական ցանցերի միջոցով կատարած մի շարք հանցագործությունների մեջ՝ «Խարդախություն» հոդվածով: Իրավապահ մարմինների աշխատակիցներն արդեն քրեական գործեր են հարուցել ՌԴ քրեական օրենսգրքի 159-րդ հոդվածով նախատեսված հանցագործությունների հիմքով:
Խուզարկությունների ընթացքում կասկածյալից առգրավվել են բանկային և SIM քարտեր, բջջային հեռախոսներ, նոթբուք և այլ իրեր, որոնք քրեական գործերի համար ունեն ապացուցողական նշանակություն:
Նշվում է, որ համացանցային գայթակղիչն անչափահաս երեխաներ չունի: