Պատժից «փրկվածները». ովքեր են ջրից չոր դուրս եկած կարկառուն ՔՊ-ականները

Վարչապետ Նիկոլ Փաշինյանը հեղափոխությունից հետո հայտարարում էր, որ կոռուպցիայի դեմ անհաշտ պայքարը դառնալու է այս իշխանությունների համար անկյունաքարային: Անցել է չորս տարի և այն կառույցը, որը, կարծես թե, կոչված էր դառնալ կոռուպցիայի դեմ պայքարի առաջամարտիկներից մեկը, ընդամենը մի քանի վարույթ է հարուցել ՔՊ-ական պաշտոնյաների նկատմամբ, այն էլ դրանցից և ոչ մեկը լուրջ հետևանք չի ունեցել վերջիններիս համար:

Դիցուք՝ Կոռուպցիայի կանխարգելման հանձնաժողովը շահերի բախում չի տեսել «Հետք» էլեկտրոնային կայքի այն հրապարակման մեջ, որում փաստվում էր, որ առողջապահության նախարարությունը նախարարի հրամանով պայմանագրեր է կնքել «ՄԻԲՍ» բժշկական կենտրոնի հետ: Կենտրոնի տնօրենը նախարարի կինն է՝ Վարդուհի Թևանյանը։

Ամիսներ առաջ Կոռուպցիայի կանխարգելման հանձնաժողովը որոշել էր աշխատանքի և սոցիալական հարցերի նախարար Զարուհի Բաթոյանի նկատմամբ կիրառել վարչական տույժ՝ նշանակելով տուգանք 200,000 դրամի չափով՝ փոխնախարար եղած ժամանակ հայտարարագրում անզգուշությամբ սխալ կամ ոչ ամբողջական տվյալ ներկայացնելու համար:

Կոռուպցիայի կանխարգելման հանձնաժողովը անհամատեղելիության պահանջների առերևույթ խախտման հիմքով վարույթներ էր հարուցել Արարատի մարզպետ Ռազմիկ Թևոնյանի և Արալեզ համայնքի ղեկավար Մարտիկ Թևոնյանի նկատմամբ: Վարչական վարույթը հարուցվել էր «Հետքի»՝ «Արարատի մարզպետը շարունակում է մնալ «Երասխի գինու գործարան» ՍՊԸ-ի տնօրենը» վերնագրով հոդվածի հիման վրա: Եվ կրկին որևէ քայլ չի հետևել:

Ինչի՞ մասին է սա խոսում` կամ պաշտոնյաները պարզապես սրբեր են և նրանց կատարած խախտումների, չարաշահումների վերաբերյալ բոլոր տեղեկությունները կեղծ են, կամ վարչապետ Փաշինյանը չի ցանկանում նկատել իր թիմակիցների կատարած խախտումները և վերջիններիս ջրից չոր է դուրս բերում: Ասել է թե, վերջին չորս տարիների ընթացքում Հայաստանում ականատես ենք լինում ոչ թե կոռուպցիայի դեմ պայքարի, այլ դրա իմիտացիայի...