Գերմանիայում Շոլցին հորդորել են զոհաբերություններ չանել հանուն Ուկրաինայի

Սաքսոնիա-Անհալթ դաշնային նահանգի Հալլե Զալեկրեիս շրջանի արհեստավորները բաց նամակով դիմել են Գերմանիայի կանցլեր Օլաֆ Շոլցին և խնդրել վերացնել Ռուսաստանի դեմ պատժամիջոցները։ Հակառակ դեպքում` Շոլցը կարող է պատմության մեջ մտնել որպես կանցլեր, ով զոհաբերել է Գերմանիան հանուն կոռումպացված Ուկրաինայի։ Այս մասին հայտնում է РИА Новости-ն։

Արհեստավորների կարծիքով՝ Ուկրաինայում տիրող իրավիճակին միջամտելու պատճառով գները երկրում ահռելի արագությամբ աճում են, և շուտով մարդիկ չեն ունենա բավարար գոյատևման միջոցներ։

«Մենք՝ որպես արհեստավորներ, մեր հաճախորդների հետ բազմաթիվ զրույցներից գիտենք, որ ճնշող մեծամասնությունը չի ցանկանում հանուն Ուկրաինայի զոհաբերել իր կենսամակարդակը, որը վաստակել է քրտնաջան աշխատանքով», - ասում են արհեստավորները Շոլցին ուղղված բաց նամակում:

Միաժամանակ, նրանք չափազանց կոռումպացված երկիր են համարում Ուկրաինան, որը Transparency International-ի կոռուպցիայի վարկանիշում զբաղեցնում է 122-րդ տեղը։

«Ոչ մի դեպքում չի կարելի Ուկրաինայի մասին խոսել` որպես անբասիր ժողովրդավարական պետության։ Եվ դուք ցանկանում եք ռիսկի՞ ենթարկել Գերմանիան դրա համար»,- ասել են արհեստավորները։